Остатоци од експлозив пронајдени на саботажата на „Северен тек“

Шведскиот обвинител кој ја води истрагата за оштетувањето на цевководите „Северен тек 1 и 2“ потврди дека инцидентот бил саботажа и рече дека се пронајдени траги од експлозив.

Во изјавата, обвинителот Матс Љунгквист рече:

„За време на истрагите на местото на злосторството што беа извршени на лице место во Балтичкото Море, беа направени опсежни заплени, а областа е внимателно документирана. Анализата која сега е направена покажува траги од експлозив на неколку од туѓите предмети што се пронајдени. Работата за напредна анализа продолжува за да може да се извлечат поцврсти заклучоци за инцидентот“.

Во соопштението се вели дека „прелиминарната истрага е многу сложена и сеопфатна“ и дека работата продолжува. Во соопштението не се наведуваат имиња на осомничени. Исто така, се пофалува соработката на властите во Шведска со оние во другите земји. Завршува со тоа дека обвинителот во овој момент не може да обезбеди дополнителни информации и нема да обезбеди дополнителен пристап до медиумите.

На крајот на септември, големите пукнатини на цевководите предизвикаа истекување на гас што беше видливо од површината на Балтичкото море.

Подводните снимки од средината на октомври го покажаа обемот на штетата. На крајот на октомври руското Министерство за одбрана го обвини персоналот на британска морнарица за кревање во воздух на нафтоводите, притоа не презентирајќи докази за да го поткрепи тврдењето, што Лондон го негираше.