Оштетувањата на системот „Патриот“ се минимални во рускиот напад на Киев

Оштетувањето на системот за противвоздушна одбрана „Патриот“ по рускиот ракетен напад во вторникот наутро во близина на Киев е минимална, изјавија тројца американски претставници за Си-Ен-Ен, а еден официјален претставник ја опишува како „мала“ штета.

САД испратија инспектори да го испитаат системот во вторникот, откако Украинците им кажаа дека системот се чини дека е оштетен, рече еден официјален претставник.

Самиот систем е сè уште оперативен, велат официјалните лица, а радарската компонента на „Патриот“, еден од неговите најважни елементи, не е оштетена. Американските власти не веруваат дека „Патриот“ ќе треба да биде отстранет од бојното поле поради поправки.

Комплетната батерија „Патриот“ има шест главни компоненти: генератори, радарски сет, контролна станица, антени, станица за лансирање и ракети пресретнувачи. Компонентите работат заедно за да истрелаат ракета „Патриот“ и успешно да ја водат до целта.

Не е јасно кој дел од „Патриот“ е оштетен или дали е оштетен од вистински ракетен напад или паѓање на остатоци. Украинците соопштија дека успешно ги пресретнале сите шест руски ракети „Кинжал“ во вторникот наутро.

Јуриј Ихнат, портпарол на командата на воздухопловните сили на Украина, изјави за украинската телевизија дека системот за воздушна одбрана „Патриот“ произведен во САД не може да биде уништен со ракета „Кинжал“.

„Не грижете се за судбината на ‘Патриот’“.