Орбан предлага преговорите на ЕУ со Украина да се одложат за 10 години

Унгарскиот премиер Виктор Орбан предложи Европската унија да склучи договор за стратешко партнерство со Украина за 5-10 години и дури по овој период да се врати на прашањето за нејзиното членство во ЕУ. Унгарскиот премиер зборуваше за ова во интервју за радио станицата Кошут.

„Ако не знаеме какви ќе бидат последиците од прифаќањето на Украина, тогаш да не почнеме да зборуваме за тоа… Прво треба да склучиме договор за стратешко партнерство, кое може да трае од 5 до 10 години, а потоа можеме да размислуваме како да продолжиме понатаму“, рече Орбан.

Според него, Европската комисија дала предлог за почеток на преговори за членство на Украина, но „тоа не се совпаѓа со интересите на многу држави“, па затоа „не треба да започнат преговори“. Ако ова прашање биде ставено на агендата на претстојниот самит на ЕУ во декември во Брисел, неговите учесници „нема да можат да се договорат меѓу себе“, рече Орбан.

„Унгарија ќе интервенира во усвојувањето на заедничка одлука. Правилата на ЕУ наведуваат дека има одредени теми за кои се одлучува само доколку се согласат сите земји членки… Однапред можете да видите дека нема да има договор, затоа предложив да не почнат преговорите за пристапување на Украина во ЕУ … а не тоа да се става на дневен ред“, вели унгарскиот премиер. Според него, грешка е да се разговара за „неподготвена“ тема.

Претходно Унгарија се спротивстави на доделувањето на 50 милијарди евра помош за Украина за покривање на буџетскиот дефицит до 2027 година. Со цел да се одобри целосната финансиска помош, ЕУ размислуваше да одмрзне околу 13 милијарди евра средства за Унгарија. Како одговор на ова, Орбан рече дека неговиот став за Украина не е предмет за пазарење. „Би сакал да разјаснам дека одбивањето на Унгарија да започне преговори со Украина за членство во ЕУ не е предмет на комерцијален договор. Тоа не може да се поврзе со прашањето за средствата што Унгарија има право да ги добива“, истакна унгарскиот премиер.