ОН го повикаа Пјонгјанг да открие каде се наоѓаат жртвите на киднапирањaтa

Канцеларијата за човекови права на Обединетите нации во Сеул ја повика денеска Северна Кореја да ја потврди судбината и местото каде се наоѓаат луѓето кои исчезнале под нејзиниот режим, обвинувајќи го Пјонгјанг за кршење на правата на жртвите и нивните семејства со децении.

Во извештајот за присилните исчезнувања и киднапирања, Канцеларијата за човекови права на ОН соопшти дека Северна Кореја треба да признае дека е вклучена во државна политика на присилни исчезнувања од 1950 година и да преземе итни чекори за ставање крај на таквите прекршувања.

Извештајот, заснован на интервјуа со дезертери, поранешни киднапирани и роднини на жртвите, дава детали за исчезнувањата, вклучително и произволни притворања во Северна Кореја и киднапирања на граѓани на Јужна Кореја, Јапонија и други земји.

„Присилното исчезнување е длабоко кршење на многу права одеднаш, а одговорноста е на државата“, рече шефот на ОН за човекови права Волкер Турк.

Пјонгјанг во повеќе наврати ги негираше наводите за кршење на правата и ги критикуваше истрагите на ОН за исчезнати лица, обвинувајќи ги САД за мешање во внатрешните работи на Северна Кореја.

Според извештајот, многу жртви на присилно исчезнување во Северна Кореја биле испратени, често доживотно, во логори за политички затвореници или други места на притвор.

„Сведоштвата од овој извештај покажуваат дека цели генерации семејства живееле со тага, не знаејќи ја судбината на нивните сопружници, родители, деца и браќа и сестри“, рече Турк.

Меѓународната заедница треба да ги здружи напорите за истрага на злосторствата извршени во повлечената земја, се вели во извештајот, нагласувајќи ја итноста со оглед на напредната возраст на жртвите и нивните семејства.

Извештајот на ОН доаѓа во време на зголемени тензии во регионот. Севернокорејскиот лидер Ким Џонг Ун нареди зголемување на производството на материјал за нуклеарно оружје и рече дека земјата треба да биде подготвена да го користи оружјето во секое време, објавија денеска нејзините државни медиуми.