Официјално: Третата најмала земја во светот го менува името наметнато од Европејците

Европските колонизатори ја преименуваа земјата во Науру затоа што им беше тешко да го изговорат нејзиното оригинално име, Наоеро

Тихоокеанската островска држава Науру официјално го промени своето име во Република Наоеро, враќајќи се на своето традиционално име, во потег за кој властите велат дека има за цел зајакнување на националниот идентитет и зачувување на културното наследство.

Парламентот на Науру усвои уставен амандман во мај за промена на името на земјата и првично планираше да одржи национален референдум.

Но, претседателот Дејвид Адеанг објави на социјалните мрежи во четврток дека референдумот е откажан. „Одлуката да не се одржи референдум беше донесена по внимателно разгледување на фактот дека Наоеро не е ново име кое сè уште не е прифатено кај граѓаните“, напиша Адеанг. „Тоа е веќе идентитет на нашиот народ, е на националниот грб, се користи во секојдневниот говор на заедницата и, најважно, е дозволено со Уставот“, додаде тој.

Скратеното име на земјата ќе биде Наоеро, додека нејзините граѓани ќе се нарекуваат деи-Наоеро.

Европските колонизатори ја преименуваа земјата во Науру затоа што им беше тешко да го изговорат нејзиното оригинално име, Наоеро. Островската нација, со население од околу 12.000 жители, е третата најмала земја во светот, по Ватикан и Монако.

Адеанг нагласи дека одлуката не е политичка, туку прашање на идентитет, наследство и „зачувување на наследството на нашите предци и зајакнување на иднината на нашите деца“. Владата официјално ги извести меѓународните организации и другите земји за промената на името, а процесот на преминување кон новото име е веќе во тек.