Одложена и денешната седница за избор на претседател на Судскиот совет
Судскиот совет не знае како да излезе од проблемите во кои сам влета. Причината за одложувањето засега е непозната
Нема решение на повидок како ќе се отплеткува заплетканата ситуација во Судскиот совет. Минатата недела, по скандалозното разрешување на претседателката Весна Дамева, беше одложена една седница за избор на нејзин наследник, а денеска се одкложи уште една седница. Причините не се јасни, освен што има кусо сооопштение.
„Судскиот совет на Република Северна Македонија известува дека 439-та итна седница која беше одложена за ден 02.05.2023 година (вторник) во 11:00 часот се одлага. За денот и часот на одржување на седницата дополнително ќе биде објавено соопштение“, стои во денешното соопштение од Судски совет.
Можеби една од причините за одложувањето на изборот за наследник на Дамева е што одлуката за нејзинио разрешување не е ни објавена во „Службен весник“, значи како да не е донесена.
Весна Дамева беше разрешена неочекувано минатата среда на јавна седница на Судскиот совет. Директен повод за разрешување на Дамева било нејзиното одбивање да стави на дневен ред нова точка и наводното криење на писмото од американската амбасадорка Анџела Агелер. Нејзиното разрешување го иницира заменикот Селим Адеми, кој по неколку часа тензии и расправии, доби поддршка од 7 од 13 члена на Советот за остратнување на Дамева од претседателското место.
Нејзиниот наследник требаше да се избира на седница на 27 април, но беше одложена за денеска. Заменик-претседателот на Советот Селим Адеми, тогаш побара одлагање за неколку дена, поради, како што рече, важноста на прашањето како што е избор на нов претседател, за кое би било добро присуство на сите 13 членови.
Дамева, која по гласањето за нејзино разрешување обвини дека „Советот е претворен во анархија“, а одлуката ја оцени како противзаконска и донесена „за да се задоволат одредени поединци од политиката“, произнесувајќи се за предлогот за одлагање на седницата, рече дека се надева оти во наредните денови ќе има доволно време да се види дали ќе се обезбеди потребното мнозинство за да се легализира, како што наведе, нејзиното незаконско разрешување.
Разрешувањето на Дамева и случувањата во Судскиот совет предизвикаа бројни реакции во јавноста, а правите експерти го оценија како нелигитимно.