Одделни средби во Владата на родители кои се за онлајн настава и кои се за физичко присуство

Премиерот Оливер Спасовски, вицепремиерката Мила Царовска, министрите за образование и за здравство Арбер Адеми и Венко Филипче, како и заменик- министерката за образование Елизабета Наумовска, денеска во одделни средби примија претставници на родители кои се залагаат за онлајн настава и за настава со физичко присуство.

-На средбите претставниците на двете групи родители имаа прилика да ги соопштат своите ставови и аргументи, како и да бидат детално запознаени со одлуката на Владата за моделот според кој ќе се организира и спроведува наставата во основното и средното образование во услови на Ковид-19, која е донесена врз основа на стручните анализи и препораки на Комисијата за заразни болести, информираат од Владата.

Претставниците на родителите на двете групи биле запознаени дека моделот за организирање и спроведување на наставата за учебната 2020/2021 година во услови на пандемијата со Ковид-19 предвидува комбинирана настава со одредени исклучоци кои одат во прилог и на застапниците на онлајн наставата и на оние кои се залагаат за настава со физичко присуство.

-Задолжителното физичко присуство на учениците од прво до трето одделение опфаќа и исклучоци за оние ученици за кои родителите ќе наведат прифатливи причини за нивните деца да биде организирана наставата со алатки за интернет комуникација, односно онлајн, велат од Владата.

Оттаму информираат дека вториот исклучок од задолжителната онлајн настава за учениците од четврто одделение во основното образование и за учениците до четврта година во средното, овозможува настава со физичко присуство само во оние училишта во кои бројката на ученици по паралелка не надминува 20, каде што е можно остварување на вториот услов за физичка дистанца од 1,5 метри меѓу учениците, и со обезбедени санитарно – хигиенски услови за одржување на општа и лична хигиена наведени во Протоколите.

-За овие исклучоци ќе одлучува работна група составена од претставници на Министерството за образование и наука, на Министерството за здравство и на Канцеларијата на претседателот на Владата, по претходно добиено позитивно мислење од Комисијата за заразни болести при Министерството за здравство, се вели во владиното соопштение.

Од Владата потенцираат дека овој комбиниран модел, бил истакнат на средбата, и е прифатен како модел кој во најголема мерка ги намалува ризиците за здравјето на учениците и наставниците и истовремено обезбедува спроведување на наставно-образовните програми.