Од уметници до политичари- црвен килим за македонската премиера на „Кајмак“ (фото)

Актери, режисери, уметници, бизнисмени и политичари прошетаа синоќа на црвениот килим пред Македонската филхармонија, каде што се одржа со нетрпение очекуваната македонската гала премиера на најновиот филм на Милчо Манчевски „Кајмак“.

По Токио и Тајпеј, „Кајмак“ дојде дома. Од денес, почнува истовремено да се прикажува во речиси 30 градови низ целата земја- Гостивар, Пробиштип, Делчево, Кавадарци, Крива Паланка, Куманово, Виница, Крушево, Струмица, Македонска Каменица, Тетово, Дебар, Берово, Неготино, Богданци, Кратово, Радовиш, Струга, Кичево, Охрид, Свети Николе, Прилеп и Штип. Премиерата во Битола и Гевгелија е закажана за 23 ноември. Во Скопје од денес филмот ќе игра во кината на Синеплекс и Милениум.

„Комшијата е најважната институција во една малограѓанска средина. Но, секое добро уметничко дело те кани да го ѕирнеш светот со поинакви очи. „Кајмак“ ја кани публиката да не суди, туку да сочувствува со ликовите – а сите тие се во исто време и жртви и душмани“, изјави Манчевски на прес конференцијата во Скопје.

 

По сценарио и режија на Манчевски, во филмот играат: Сара Климоска, Камка Тоциновски, Александар Микиќ, Симона Спировска, Ана Стојановска, Филип Трајковиќ, Петар Мирчевски, Сашка Димитровска, Лазе Манасковски, Јасмина Василева, Дејан Лилиќ, Елена Кузманов, Крсте Роџевски, Ратка Радмановиќ, Ана Димитрова, Никола Ристески, Ангела Димитрова, Соња Михајлова, Александра Пешевска, Ѓорѓи Јолевски, Љиљана Богојевиќ, Сара Станиќ и други.

 

Македонски продуцент на филмот е Банана филм. Продуцира Јане Ќортошев. Музиката е на култниот „Дејниш стринг квартет“, а дополнителната музика на Игор Василев-Новоградска.