Од доктор, министер, сега и пратеник: Хусни Исмаили заминува од културата


По една година како министер за култура Хусни Исмаили (57) ќе седне во пратеничките клупи на македонското Собрание. Пред една година на жешката столица во Министерството за култура го наследи Адеми, како предлог на Алтернатива. Неговиот избор беше изненадување како лекар-ревматолог кој сепак имал искуство и како професор и во издаваштвото.

Синоќа, на свеченото отворање на јубилејното „Охридско лето“ Исмаили се обрати за последен пат како министер за култура.

-Фестивалот „Охридско лето” не се мери веќе со годините на неговите изданија, но се мери со уметничките успеси што ги носи секоја година…Јас сум силно убеден дека никој повеќе не може да не го признава престижот на фестивалот кој што денес е повеќе од очекувањата на самите основачи пред 60 години, зошто да не и повеќе од нивните соништа за еден фестивал што ќе биде уметнички амблем на Северна Македонија на уметничката светска арена, рече синоќа Исмаили од сцената на Антички.

Се чека конституирањето на Владата за да се види која партија ќе го добие ресорот Култура.

Заменик министер за култура е актерот Владимир Лазовски.