Обвинителство: Нема врска што сме на одмор, го работиме „Рекет“

Основното јавно обвинителство тврди дека без оглед што главните обвинители се на одмор додека случајот „Рекет“ е пред експлозија, истрагата си терала без проблеми. Од таму тврдат дека работат плански и уверуваат оти сите ќе дојдат на ред, како контрааргумент на прашњата на јавноста зошто досега специјалната обвинителката Катица Јанева не е повикана на распит, иако на последните снимки се слуша и нејзниот глас во контекст на разговорите меѓу Орце Камчев и Бојан Јовановски.

„Јавното обвинителство ја известува јавноста дека снимките објавени во еден италијански медиум поврзани со предметот „Рекет“ не се добиени од обвинителството. Станува збор за аудио и видео материјали кои се дел од доказната постапка во предметот и кои до јавното обвинителство беа доставени од сведок во предметот. Јавното обвинителство во предметот постапува професионално и неселективно. Притоа се проверуваат сите индиции и сите аспекти. Истражната постапка е во тек и јавниот обвинител презема истражни дејствија за да се обезбедат доказите и да се утврди фактичката состојба според подготвен план кој обезбедува целосно истражување на случајот. Доколку во текот на истрагата бидат утврдени елементи на други кривични дела или други сторители, постапката ќе биде проширена, а јавноста за тоа веднаш ќе биде известена. По целосно завршување на истрагата ќе биде донесена јавнообвинителска одлука. Притоа, нагласуваме дека годишните одмори не се одразуваат на водењето на истрагата. Во периодот кога дел од јавните обвинители користат годишен одмор назначени се обвинители кои ги заменуваат, како и истражители кои секојдневно активно работат на предметот. Функцијата на јавното обвинителство се извршува непречено“, тврдат од Обвинителството.

Во моментов, на одмор надвор од државата се главниот обвинител Љубомир Јовески, обвинителката Вилма Русковска која го води случајот „Рекет“, но и Катица Јанева од СЈО, која се поврзува како гарант на ветувањата на Боки 13 кон Камчев дека ќе му помогне во случајот „Империја“.