Обуки за наставници за поттикнување вештини за претприемништво кај младите
Агенцијата за поддршка на претприемништвото на Република Северна Македонија (АППРСМ) денеска почна со реализација на обуки за поттикнување на вештините за социјално и зелено претприемништвото кај младите преку обуки за наставниците од средното образование.
Обуките кои ќе се одржат во Скопје, Велес, Кочани и Битола се пред сѐ наменети за усовршување на методот за предавање преку примери и предвидуваат студиски посети или гостински предавања на основачи на социјални претпријатија.
Програмата ја реализираат претприемачи и истакнати професори и истражувачи во областа на претприемништвото, раководени од проф. д-р Марјан Бојаџиев и претприемачот и истражувач Македонка Димитрова од Универзитетот Американ колеџ-Скопје – Институтот за претприемништво и лидерски развој.
Според директорот на АППРСМ Шенаси Џеладини, годинашната програма за поддршка на претприемништвото во Република Северна Македонија предвидува неколку атрактивни содржини меѓу кои во тек е спроведување образовни обуки за наставници на актуелните теми како што се социјалното и зеленото претприемништво.
-Сметаме дека наставниците кои предаваат претприемништво и бизнис се наша продолжена рака за поттикнување на претприемaчкиот дух кај младите генерации особено преку основање социјални претпријатија и зелени бизниси. Ова е единствен пат кон похумано и одговорно општество преку деловните потфати на младите, изјави Џеладини.
Македонка Димитрова од УАКС посочи дека обуките се обид да се прикажат успешни примери за социјални и зелени бизниси и да се покаже на младите од земјава може да раководат со успешни социјални и зелени бизниси.
-Тоа е нешто што недостига во учебниците, локалните примери и учење преку примери се иднината на образованието на полето на претприемништвото. На УАКС Институтот за претприемништво и лидерски развој овој наставен метод, по примерот на Универзитетот Харвард, го применуваме повеќе од 15 години и сметаме дека има голем успех кај новите генерации, додаде Димитрова.