На транспарентот кој го држат десетина лица чии лица се замаглени пишува: „Долга река Ибaр. Крв од планина. Две глави има орелот, а една е во Митровица“. Други двајца го држат знамето на Албанија, а други уште еден транспарент.

Засега нема никаква официјална информација во врска со овој настан кој го пренесоа неколку групи по социјалните мрежи и локални медиуми на албански јазик.

Лидерот на ДУИ, Али Ахмети, преку напис на социјалните мрежи нападот во Косово го квалификува како сериозна провокација и, според него, тој може да има и регионални последици.

„Убиствениот напад врз Косово и полицијата во земјата е напад врз мирот, стабилноста и безбедноста на целиот регион“, пишува Ахмети.

„Најостро ги осудувам нападот врз косовската полиција и убиството на полицаецот, како и ранувањето други лица утринава на северот од Косово“, додава лидерот на ДУИ.

Таквата, како што ја нарекува сериозна провокација, според него, е намерна со однапред одредена агенда, затоа порачува дека треба да се управува со ладнокрвност и мудрост бидејќи последиците може да бидат регионални врз мирот и стабилноста.

„Овие случувања се неприфатливи и координацијата и соработката со меѓународната заедница, гарантирајќи го мирот и независноста во Косово, се неопходни и итни. Потребна е итна акција за гаснење на малигниот пожар, кој има цел проширување и вклучување на регионот.Изразувам искрено сочувство до семејството на жртвата и брзо закрепнување на повредените“, пишува Ахмети на „Фејсбук“.

Вчера пак лидерот на Беса, Билал Касами, порача дека Србија сака да почне војна на Косово и дека тие „се подготвени на секаков вид на поддршка“. Инаку, во Македонија со закон е забрането во воени конфликти во друга држава и тоа беше причината поради која борците на ИСИС што се вратија назад завршија зад решетки.