Обама се вклучи во трката – го поддржа Бајден

Поддршката на поранешниот претседател е од клучна важност за Бајден во дуелот со Трамп

Вашингтон – Поранешниот американски претседател Барак Обама го поддржа Џо Бајден за кандидат на демократите во вторникот, со што го прекина молкот за да му помогне на неговиот поранешен потпретседател за обединување на партијата и да ги енергизира неговите гласачи пред изборите на 3 ноември.

Откако цело време остана на страна кога имаше рекорден број демократски кандидати за да се изборат за дуел со  претседателот Доналд Трамп, Обама му даде поддршка на Бајден во видео порака.

„Изборот на Џо за мој потпретседател беше една од најдобрите одлуки што некогаш сум ги донел и тој ми стана близок пријател. И верувам дека Џо ги има сите квалитети што ни се потребни во претседател во моментов“, рече Обама во видеото.

Поддршката од првиот црн претседател на САД дојде откако последниот преостанат ривал на Бајден во демократската трка, сенаторот Берни Сандерс, го поддржа Бајден во понеделникот.

Зголемувањето на поддршката на Бајден му дава моќ и внимание во време кога американската јавност е интензивно фокусирана на реакцијата на владата на пандемија на корона вирусот, која ја истурка претседателската трка надвор од центарот на вниманието.

„Бидејќи тој е толку популарен и споредбата меѓу претседателот Трамп и Барак Обама е толку остра, тоа ќе биде толку обединувачки, мотивирачки фактор“, рече Тери Меколиф, поранешен гувернер на Вирџинија и долгогодишен функционер на партијата.

Три години откако ја напуштија Белата куќа, Обама и неговата сопруга Мишел остануваат две од најомилените фигури во Демократската партија. Трамп победи во 2016 година ветувајќи дека ќе поништи многу од политиките на претседателот кој служеше два мандати.

„Обама немаше друг избор освен да го поддржи“, рече Бред Парскал, менаџер на кампањата „Трамп 2020“, во изјавата. „Бајден е лош кандидат кој ќе се посрамоти себеси и неговата партија. Претседателот Трамп ќе го уништи“.

Популарноста на Обама во рамките на Демократската партија може да го засили Бајден, особено меѓу демографските групи каде тој се мачи. Анкетата на Си-ен-ен објавена кога Обама ја напушти канцеларијата покажа дека повеќе од 70 отсто од гласачите на возраст под 34 години гледаат поволно на него како и 90 проценти од лицата кои самите се опишуваат како либерали.

Бен ЛаБолт, секретар за печат за кампањата за повторен избор за Обама во 2012 година, рече дека додека Обама може да им се допадне на младите гласачи кои го поддржале Сандерс, тој исто така евентуално може да ги врати умерените гласачи кои гласале за него, но потоа се префрлија кај Трамп во 2016 година.

Исто така, може да му помогне на Бајден да ги зголеми своите напори за собирање средства, како и да го зајакне со користење на динамично присуство на социјалните медиуми со големо и посветено следново.

„Нема подобар сурогат во земјата кој може подобро да му помогне на Џо Бајден отколку Барак Обама“, рече ЛаБолт.

Поддршката на поранешниот претседател им дава зелено светло на поранешните официјални претставници на Обама, богатите донатори и функционери на Демократската партија да застанат зад каузата на Бајден, доколку веќе не го направиле тоа.

Обама рече дека Бајден имал карактер и искуство да ја води земјата преку закрепнување од „едно од најтемните времиња“. Тој не го спомена Трамп по име ниту го нападна за справување со пандемијата на корона вирусот и се држеше до долгогодишната традиција поранешен претседател да не го критикува актуелниот шеф на државата во време на криза.

На крајот на краиштата, Обама веројатно ќе може да го направи она што го стори за кампањата на Хилари Клинтон за 2016 година, привлекувајќи големи, ентузијастички толпи во пресрет на денот на изборите.

Обама во изминатите недели имал повеќе разговори со Сандерс и другите за тоа како најдобро да се позиционира партијата за изборниот натпревар против Трамп, соопштија извори.

„Тој беше импресиониран од калибарот на нашите кандидати и од силните кампањи што ги водеа – но секогаш ги повикуваше да имаат предвид дека мора да бидеме добро позиционирани да се обединиме како партија, откако ќе имаме номинација“, рече лице запознато со разговорите на Обама.

Обама исто така го советуваше Бајден за клучните елементи на неговата општа изборна стратегија, вклучително и да избере потпретседател кој ќе му одговара. (Ројтерс)