Новороденче почина во болница: „Никој од персоналот немало таму да го сврти или потапка бебето“

Вишото државно обвинителство во Подгорица ги истражува околностите за смртта на новороденчето кое почина во саботата навечер во болница во Никшиќ поради задушување со млеко.

Обдукцијата е завршена, а причината за смртта е доставена до семејството на починатото бебе, како и до Вишото државно обвинителство, кое побара обдукција, изјави д-р Немања Радојевиќ за Vijesti.me.

Според неофицијални информации, новороденчето е родено здраво и било задржано на одделението за неонатологија поради покачени нивоа на билирубин, односно жолтица, но оваа честа состојба кај новороденчињата не е причина за смртта. Во моментот на смртта, на одделението биле дежурни лекар и медицинска сестра, велат изворите.

Во писмото што семејството го доставило до медиумите, пишува дека девојчето Х. Ш. од татко Г. Ш. и мајка Т. Ш. е родено здраво на 22 октомври, а породувањето, кое поминало без никакви компликации, било оценето со највисока оценка.

„Во сабота, на 25 октомври, на новороденчето му била дијагностицирана жолтица. Било одвоено од мајката околу 18:30 часот и преместено во соба каде што требало да остане 24 часа. Сепак, никогаш не се вратило“, објавија црногорските медиуми.

Семејството тврди дека, според прелиминарниот извештај од обдукцијата што го добиле, смртта настапила во саботата околу 21:10 часот, а како причина за смртта е наведено задушување со храна.

„Бебето било оставено само, никој од болничкиот персонал не бил таму да му помогне, да го сврти, да го потапка, што и да е…“, вели семејството.

„Вијести“ неофицијално дознава дека покрај внатрешната болничка комисија, со овој случај ќе се занимава и комисијата на Министерството за здравство.