Ново прегрупирање во Македонијатурист, ова се сега најголемите акционери

За само неколку дена има ново прегрупирање во најголемата македонска хотелиерска
компанија, Македонијатурист АД Скопје. Друштвото е сопственик на хотелите
Холидеј Ин, Карпош, Водно, Бристол, Јадран, Best western и Bellevue.

Од вчера, како што објави еМагазин, еден од најголемите акционери е Скопски пазар
АД Скопје, најголемата скопска компанија за издавање недвижен имот, која сега
поседува 9,9% од акциите на Друштвото.

Скопски пазар ги купи акциите на тетовската градежна компанија Изо Стоне, која
пред извесно време купи акции на Македонијатурист, кои преставуваа 6,62% од вкупниот број.

Претходно акционер со над 5% од акциите на Македонијатурист стана и М.Г. Фешн
ДОО Скопје, која сега поседува 7,69% од вкупниот број на акции.

Доне Таневски и понатаму останува најголем акционер во Македонијатурист и
поседува 23,4% од акциите.

Самото Друштво поседува 10% од акциите, но тие согласно законската регулатива се
стерилизирани и не носат право на глас, ниту носат дивиденда.

Во акционерската структура на Македонијатурист покрупни акционери се и
отворениот задолжителен пензиски фонд на Сава, кој поседува 8,8% од акциите и
Симеон Павлов, кој поседува 8,2% од акциите.