Новиот пакет за економска обнова на ЕУ е со пократок период и 26 милијарди евра помалку


Претседателот на Европскиот совет Шарл Мишел го објави предлогот на Повеќегодишната финансиска рамка за периодот од 2021 до 2027 година и планот за обновување на економијата на Европската унија, во кој понуди отстапки за различни групи на земји-членки, со цел полесно да го прифатат целиот пакет мерки, пренесе Хина.

Предлогот на Мишел, објавен во петокот, ќе биде на состанокот на лидерите на земјите членки на ЕУ на крајот на следната недела. Состанокот ќе се одржи во петок и сабота, 17 и 18 јули, а постои можност тој да биде продолжен до недела. Доколку не се постигне договор, најверојатно ќе се одржи уште еден самит овој месец, а како можни датуми се споменуваат 27 и 28 јули.

За разлика од предлогот на Европската комисија, пакетот на Мишел опфаќа нешто пократок временски период, од 2021 до 2027 година, како и 1.074 милијарди евра, што е за 26 милијарди помалку од предлогот на Европската комисија.

Оваа отстапка во планот на Мишел ја направи за т.н. „штедлива четворка“ – Австрија, Данска, Холандија и Шведска, кои имаа најмногу забелешки на планот за закрепнување и за износот на средства, како и на фактот дека повеќето средства за обнова се доделуваат како грантови.

Токму овие четири земји придонесоа најмногу за неуспехот на последниот обид за преговори за повеќегодишната финансиска рамка на крајот на февруари. Планот на Мишел им понуди на овие земји уште една отстапка и станува збор за задржување на попустот. Системот за попуст беше воведен така што побогатите членки на ЕУ не плаќаат непропорционално повеќе пари во однос на нивниот бруто национален приход, а Мишел предложи паушална сума за секоја од овие земји со цел да го намали нивниот придонес во буџетот.

Претседателот на Европскиот совет го задржа во својот план предлогот за закрепнување со износот и обликот формулиран од Европската комисија, што оди во прилог на втората група земји кои се најпогодени од кризата предизвикана од пандемијата и кои беа во криза пред пандемијата, со висок јавен долг и мал фискален капацитет.

За да можат да ги искористат средствата обезбедени со предлогот на Мишел, земјите-членки ќе треба да изготват свои национални планови за закрепнување и реформи за периодот од 2021 до 2023 година, во согласност со препораките што Комисијата ги испрати до сите членки, а кои тие ги следеа малку.

Според планот на Мишел, отплатата на долгот со кој ќе се финансира закрепнувањето треба да започне во 2026 година, а не во 2028 година, како што е предложено од Европската комисија.

Планот на Претседателот на Европскиот совет подразбира дека во буџетот се предвидени посебни средства во висина од 5 милијарди евра наменети за помош на земјите и секторите кои се најпогодени од излегувањето на Велика Британија од ЕУ.