Новинарот кој спаси возач во Австралија: „Беше застрашувачки“

Телевизиски репортер од Австралија го опиша драматичното спасување на човек од автомобил однесен од поплавните води како застрашувачко искуство, но додаде дека чувството на спасување на човечки живот е „едно од најдобрите“. Вил Мареј, новинар за австралискиот јавен радиодифузер ABC, вчера известуваше од поплавено подрачје северно од Бризбејн во Квинсленд. За време на неговото известување, возач се обиде да го премине патот со теренец под вода, но неговото возило се заглави и почна да тоне, објави Ројтерс.

„Беше застрашувачки. Само помислата да гледам како некој се дави… разбирам зошто луѓето едноставно замрзнуваат во вакви ситуации, бидејќи е ужасно да се види некој во таква опасност“, рече Мареј. Тој и минувачот Даниел Хејни допливаа до автомобилот и успеаја да го извлечат возачот само неколку моменти пред возилото целосно да исчезне под водата.

Мареј не го знаеше името на спасениот човек, но рече дека се надева дека е добро. „Откако го извлековме, цврсто се прегрнавме. Морам да кажам дека тоа беше еден од најубавите моменти во мојот живот. Тоа чувство на олеснување кога ќе видите некого безбеден и здрав… тоа ми беше доволно“, рече тој.

That guy is lucky! Rescued from Brisbane flood waters today by an ABC reporter and bystander 😲 https://t.co/7fjhuVDrV3

— Francynancy (@FranMooMoo) October 22, 2026

Службите за итни случаи во југоисточен Квинсленд добија стотици повици за помош во четврток и петок, бидејќи обилните дождови, кои на некои места надминаа 200 милиметри, предизвикаа ненадејни поплави што доведоа до затворање на бројни патишта и училишта.