Нови мерки во Италија откако беа забележани 5.901 новозаразени


Италијанскиот премиер Џузепе Конте денеска објави нови мерки против ширењето на коронавирусот откако во Италија беа пријавени 5.901 нов случај, најмногу од крајот на март.

Италијанската влада по вторпат ги заостри мерките во текот на оваа недела, иако ситуацијата во земјата е помалку сериозна отколку во другите европски земји како Велика Британија и Шпанија.

– Треба да избегнеме вовлекување на земјата во нова целосна блокада, бидејќи економијата веќе почна да расте – рече Конте на прес-конференција.

Со уредба на владата, која стапува на сила за 24 часа и ќе важи 30 дена, се забрануваат забави во ресторани, клубови и на отворено. На граѓаните им се препорачува да не организираат забави во своите домови и да не примаат повеќе од шест лица истовремено.

Носењето маски се препорачува и во домашни услови, кога граѓаните имаат гости.

Максимум 30 лица ќе можат да бидат присутни на свадби и други свечености.

– Нема да испраќаме полиција по куќите на луѓето – рече Конте, одговарајќи на широката критика дека владата неоправдано сака да го контролира однесувањето на граѓаните во нивните домови.

Во Италија, во последните 24 часа пријавени се 5.901 случај на заразени, што е најголем број од крајот на март кога беа затворени продавниците, рестораните и повеќето работни места.

Секојдневно се зголемува и бројот на починати. Денеска се забележани 41 смртен случај, но тоа е сепак многу помала бројка отколку кон крајот на март и почетокот на април кога на дневно ниво умираа повеќе од 900 луѓе.

Новите мерки предвидуваат рестораните и баровите да бидат отворени до полноќ, но по 21 часот им е дозволено да служат само гости кои седат на маса. Овој потег е со цел да се спречи големи собири на терасите.

Училиштата остануваат отворени, но бројот на дозволени воннаставни активности се намалува.