Нови ЕУ правила против непотребни пакувања и за повеќе рециклажа

Европската комисија го презентираше својот предлог за нови правила во цела ЕУ за да се намалат пакувањата кои создаваат непотребен отпад.

Со новите правила кои ги предлага Европската комисија целта е да се олеснат информациите кои ги добиваат потрошувачите и индустријата во однос на биоразгрдлива пластика, а се воведува и нова ЕУ рамка за сертификација на високо квалитетно отстранување на карбон, но на доброволна база.

Ова, смета Европската комисија, ќе биде важен дел од нејзиниот Зелен Договор и Планот за циркуларна економија за постигнување на климатските амбиции на ЕУ.

Според студиите европските граѓани во просек генерираат 180 килограми отпад од пакувања, и доколку не се преземе ништо оваа бројка ќе достигне 215 килограми до 2030 година.

Со овие нови правила Европската комисија е уверена дека ќе се стопира овој тренд и ќе се обезбеди рециклирано пакување и ќе се намали непотребното пакување. Што се однесува до доброволната рамка за сертификација на отстранување на карбон, предлогот ќе поттикне иновација во областа на технологиите за отстранување на карбон во земјоделството и ќе придонесе за нула загадување.