Нова занимална во градинката „Мајски цвет“ во Тафталиџе 1

 Во рамки на градинката „Мајски цвет“ во Тафталиџе 1, направена е нова занимална за јасли група, каде на почетокот на септември ќе бидат згрижени нови дечиња, кои имаат изразено интерес да ја поседуваат оваа предучилишна установа, информира Општина Карпош.

Занималната е опремена со нови шкафови и кревети, како и дидактички материјали и играчки што ќе им овозможат правилен развој на децата. Исто така, од Општина Карпош соопштија дека во моментов се работи на отворање уште една занимална во истата градинка.

– Во текот на пандемијата, градинките беа и сè уште се меѓу најпогодените установи во однос на редуцирање на просторот за прием. Капацитетите за згрижување сè уште се во намален број, како резултат на протоколите пропишани од Комисијата за заразни болести, а наспроти тоа интересот за посета на градинките е зголемен, велат од Општината.

Од таму додаваат дека во градинката „Мајски цвет“ целосно се реконструирани тоалетите, поставени се нови прозори и врати, а заменета е и кровната површина, како и фасадата која сега е енергетски – ефикасна.

Општина Карпош ги информира сите родители дека се прават сериозни напори во градинките да се отворат повеќе групи, да се зголеми воспитниот кадар, а притоа, најмладите да бидат заштитени и безбедни.