Нова драма пред „Комунална хигиена“, се бара оставка од директорката Мазнева
Градоначалниците во Скопје се самоорганизираа за да го соберат ѓубрето, но депонијата Дрисла одбиваше да ги прими камионите бидејќи за тоа не ја известиле Данела Арсовска.
Директорката на скопска „Комунална хигиена“, Косана Мазнева, вечерва успеа да мобилизира неколку камиони за да собираат смет низ Скопје, но вработените кои протестираат не дозволија тие да излезат од кругот на претпријатието. Полицијата и раководни лица се обидоа да ги убедат да се тргнат од портите, но неуспешно.
„Не мрдаме, нека не газат“, довикуваа лицата кои седнаа пред капијата.
Директорката Мазнева се соочи со нив, но наиде на скандирања и негодување.
„Дали вие вечер ќе работите?”, ги праша Мазнева, а тие скандираа – „оставка“.
„Нека даде оставка, одма се тргаме. До седум сабајле цело Скопје ќе биде чисто. Кога ќе даде оставка ќе се тргнеме“, довикуваше вработен.
„Не мрдаме од овде“, „Нека не газат“, „и ние сакаме да живееме“, довикуваа лицата кои седнаа пред капијата.
Тие ја обвинија Мазнева дека ги понижува и продолжија со барањето за оставка. Мазнова побарала од присутните полицајци и специјалците да ги легитимираат лицата зошто се сомневала дека барикада прават и некои кои не се вработени во јавното градско претпријатие.
„Сите сме вработени ние тука, за парче леб сме“, возвратиле лицата распоредени на капијата од претпријатието.
Нешто подоцна пред јавното претпријатие „Комунална хигиена“ интервенираше Брза помош кои зедоа работник во униформа. Тоа се случи откако полицијата интервенираше и ги тргна настрана вработените кои го блокираа излезот за камионите. Работникот со носилка и во свесна состојба беше пренесен во комбето на Брзата помош.
По реакција на полицијата, седум камиони на јавното претпријатие „Комунална хигиена“ излегоа да го чистат ѓубрето. Тие што протестираа пред влезот на претпријатието реагираа бурно, но полициските службеници ги предупредија дека ако некој ги попречи при воведувањето на ред ќе бидат приведени.
„Од овој момент кој ќе попречи службено дејствие ќе биде приведен“, им рече претставник на МВР. на вработените.
Бидејќи градот два дена се гуши во смет, градоначалниците од ВМРО-ДПМНЕ вечерва се самоорганизираа и со помош на комунални служби од другите градови од Македонија излегоа вечерва да го чистат натрупаниот смет и ѓубре на улиците. Но, депонијата Дрисла одбива да ги прими камионите со смет што вечерва собираа ѓубре, а причина за ова, како што дознава неофицијално, било тоа што градоначалничката на град Скопје, Данела Арсовска, не била известена за акцијата од градоначалниците на ВМРО-ДПМНЕ.
Сѐ уште нема информации дали членовите на Кризниот штаб на град Скопје знаат за ова, но се очекува по итната седница што се одржува вечерва да има изјава за медиумите.
Утре градоначалниците и од ВМРО-ДПМНЕ и од СДСМ заедно ќе побараат од Советот на Град Скопје да го укине ЈП Комунална хигиена.
Данела Арсовска стана градоначалничка на Скопје како кандидат на ВМРО-ДПМНЕ на локалните избори есента 2021. Тогаш сите сегашни градоначалници на ВМРО-ДПМНЕ шетаа со неа на изборните митинзи и ги повикуваа граѓаните да гласаат за Арсовска како жена менаџер, која ќе го направи Скопје модерно место за живеење.
Во Скопје за прв пат во неговата историја ѓубрето не се собра два дена поради протести на вработените кои се незадоволни од раководството на претпријатието.