Норвешкиот државен фонд оствари добивка од 103 милијарди евра

Норвешкиот државен фонд денеска објави дека во првиот квартал од 2024 година остварил профит од 1,21 билиони норвешки норвешки круни, или приближно 103 милијарди евра, благодарение на високите приноси од инвестициите во акциите на технолошките компании.

„Нашите капитални инвестиции имаа многу високи приноси во првиот квартал, особено во технолошкиот сектор“, изјави заменик-извршниот директор на фондот Тронд Гранде, пренесува Си-Ен-Би-Си.

Таканаречениот државен пензиски фонд Глобал, најголемиот државен фонд во светот, соопшти дека на крајот на март има вредност од 17,7 билиони норвешки круни.

Во изјавата, релативниот принос во првите три месеци од 2024 година го опиша како „добар“ за капитални инвестиции и инвестиции со фиксен приход, но истакна дека резултатите се послаби во категоријата недвижности.

Повратот на вложувањата во капиталот на фондот во првиот квартал изнесува 9,1 отсто, додека повратот на вложувањата со фиксен приход е минус 0,4 отсто, а повратот од вложувањата во недвижности што не котираат на берзата е минус 0,5 отсто.

Норвешкиот суверен фонд, еден од најголемите светски инвеститори, е основан во 1990-тите со цел земјата да инвестира вишок приходи од секторот за нафта и гас.

До денес, фондот има инвестирано во повеќе од 8.800 компании во повеќе од 70 земји во светот.