Норвешка донира медицинска опрема за полската болница Rolle 2

Донација од еден тон медицински материјал од Норвешка, која се состои од медицински маски, маски за изолација, заштитни маски, заштитни наочари и термометри наменети за полската болница Rolle 2, во врдност од околу 200 илјади евра, реализирана преку Агенцијата за поддршка и набавки на НАТО и транспортирана од Алијансата, денеска беше предадена во касарната Илинден во Скопје.

Норвешкиот министер за одбрана, Франк Баке Јенсен преку видеопорака посочи дека оваа донација е еден симбол на благодарност до нашата земја, која ја сметаат за сојузник и многу добар пријател и дека ќе ги обезбеди основните алатки во борбата против Ковид-19.

– Драго ми е што полската болница што ви ја дониравме ја користите во борбата против КОВИД-19. Донацијата што денеска ви ја доставуваме ќе ви помогне во таа борба, рече Баке Јенсен во видепораката.

Државниот серетар во Министерството за одбрана Драган Николиќ истакна дека со денешната донација уште еднаш се покажува значењето на нашето полноправно членство во НАТО.

– Донацијата од Кралството Норвешка што се состои од се она што е потребно во овој момент за справување со корона кризата се реализира преку НАТО агенцијата за поддршка и набавки со што нашите НАТО-сојузници ја покажуваат солидарнста и соработката со сите земји-членки, посочи Николиќ по предавањето на помошта.

Тој нагласи дека Министерството за одбрана и Армијата уште во првите моменти на пандемијата со Ковид-19 во нашата земја дадоа комплетна логистичка поддршка во борбата и справувањето со ширењето на коронавирусот.

– Во тој контекст ги проширивме и капацитетите на Инфективната килинка со поставување на мобилната полска болница Rolle 2, која всушност е донација од Кралството Норвешка. Во секој момент сме подготвени за поддршка на здравствените институции со сите капацитети кои можеме да ги понудиме, рече Николиќ и додаде дека соработката со Норвешка датира уште од 2007 година преку обуката на македонските хируршки тимови кои учествуваа во мисијата во Авганистан.

Заблагодарувајќи се за донацијата на Алијансата и на Норвешка, тој посочи дека на овој начин уште еднаш се покажа соработката на сите земји од НАТО со најновата членка која неодамна му пристапи на воено-политичкиот сојуз.

Николиќ најави дека по првата пратка од норвешката донација ќе следат уште транши за обезбедување на медицински средства кои ќе помогнат во идниот период во справувањето со пандемијата.

– Ќе имаме и нови фази, ќе се потпишат и нови договори со Кралството Норвешка преку поддршката од НАТО Агенцијата за логистика и набавки што ќе се базираат на спецификациите од нашиот Воено медицински центар. Солидарноста и што значи НАТО-сојузништво на овој начин се покажува на терен, потенцира Николиќ.

Норвешкото воено аташе во земјава потполковник Егил Далтвеит посочи дека донацијата што Министерство за одбрана на Норвешка ја предава денеска на Армијата на Република Северна Македонија претставува практична алатка која може да се искористи во борбата против КОВИД-19.

– Истовремено таа претставува само уште еден чекор во долгата и богата воено-медицинска соработка. Ние ги обучивме вашите доктори и медицински сестри и помогнавме во опремувањето на вашите воено-медицински капацитети, како што е вашата теренска болница. Вие ги испративте вашите војници и војнички да служат во Авганистан во мисија предводена од Норвешка. Со нивните одлични и професионални операции вашите луѓе спасуваа животи на норвешки војници кога беа тешко повредени од Талибанците. Тоа не сме го заборавиле и нема да го заборавиме, рече Далтвеит.

Тој нагласи деака низ годините станаа многу блиски и пријателски релациите меѓу оружените сили на двете земји, а денеска, како што рече, сме дури и побилски од пријатели и сме сојузници во најуспешната воено-политичка алијанса во историјата.

Шефот на Канцеларијата за врски со НАТО во Скопје, полковник Зоран Јанковиќ посочи дека норвешката донација не претставува билатерална, туку здружена активност, бидејќи во неа партиципираше и Агенцијата за поддршка и набавки на НАТО и додаде дека во Алијансата не се зборува само за текнови, пушки и артилерија, туку и за областа на медицината која е многу важана.

– Донацијата е многу важна бидејќи се наоѓаме сред пандемија со Ковид-19, а Норвешка е многу активна на медицинско поле на целиот Балкан. Медицинската опрема е со двојна намена може да се користи во операции низ целиот свет, но може да се користи и за потребите на земјата, рече Јанковиќ.