Ноќта кога го пронајдовме „Папокот на светлината“ – промовиран новиот роман на Венко Андоновски
Во кино „Милениум“ во Скопје синоќа влеговме какви што сме. По час и половина излеговме како други луѓе. Подобри.Промоцијата на новата книга на Венко Андоновски, „Папокот на светлината“ (Издавачки центар ТРИ) беше прекрасен повод за да се собереме толку многу на број и цел час да ги слушаме зборовите на познатиот автор и професор Венко Андоновски.
Културната елита, обожаватели и читатели кои десет години го чекаа новиот роман по објавувањето на последниот роман „Ќерката на математичарот“ и 22 години од „Папокот на светот“, книгата што ги освои книжевните награди Роман на годината, „Стале Попов“, „Балканика“ и руската награда „Југра“.
Настанот го отвори Весна Мојсова-Чепишевска, која даде извонреден осврт кон ликот и делото на еден од најпознатите македонски автори. Потоа познатата авторка и издавач Винка Саздова го водеше разговорот со писателот и успеа да допре до срцевината на романот кој допрва ќе го читаме, но и до срцевината на човекот. Беа загатнати и одговорени многу прашања за вербата и невербата, суетата, религијата, љубовта, општеството, човекот, меѓучовечките односи, светот. Потоа за дуалните односи на животот и смртта, моментноста и бесконечноста, ангелот и ѓаволот, доброто и злото…
На сцената беше и Игор Џамбазов, кој правејќи му го на Венко Андоновски таканаречениот Прустов прашалник, успеа да ни го доближи Венко преобразувајќи го од наш омилен автор во наш омилен човек.
По 22 години од објавувањето на „Папокот на светот“ и 10 години од објавувањето на последниот роман „Ќерката на математичарот“, добивме книга за која веруваме дека ќе стане исто толку култна колку и другите негови дела. Оваа промоција ни ја врати вербата дека македонските читатели сакаат да читаат домашна литература. Слушавме во тишина. Онака како што најдобро се слуша, со срцето.