„Њујорк тајмс“ открива зошто Доналд Трамп Јуниор беше во Белград на средба со Вучиќ

Протестите против српскиот претседател Александар Вучиќ стануваа поинтензивни и поголеми кога овој месец во главниот град пристигна необичен гостин за да се сретне со европски лидер кој се соочува со предизвици: Доналд Трамп Јуниор, најстариот син на претседателот Трамп, пишува „Њујорк тајмс“.

Ова се главните точки од опсежната анализа на „Њујорк тајмс“ за мотивите за посетата на Доналд Џуниор на Вучиќ:

„Брзата посета на Трамп, која вклучуваше средба со Вучиќ за да се разговара за американската странска помош за Србија, дојде додека семејството Трамп и Џаред Кушнер, зет на американскиот претседател, напредуваа со плановите за изградба на хотел Трамп нтернационален хотел во Белград – првиот таков објект во Европа.

Планирано е хотелот да се изгради на местото на поранешниот Генералштаб, кој беше бомбардиран од НАТО пред 26 години, а земјиштето сега е на Владата на Србија. Опозициските лидери во Србија го критикуваа овој договор и повикаа на негово укинување, зголемувајќи ја можноста договорот да биде поништен во случај на промена на власта.

Трамп Јуниор ја искористи оваа посета како можност да ја изрази својата поддршка за Вучиќ – патување кое можеби најеклатантно досега го покажа мешањето на надворешната политика на Соединетите Држави и финансиските интереси на семејството Трамп за време на вториот мандат на претседателот Трамп.

Во средата, српскиот парламент ја прифати оставката на премиерот, соборувајќи ја владејачката партија и принудувајќи го Вучиќ да формира нова влада или да распише нови парламентарни избори подоцна оваа година, создавајќи дополнителна неизвесност.

Портпаролот на Доналд Трамп Јуниор отфрли каква било сугестија дека неговата посета создава конфликт на интереси. Тој рече дека патувањето било мотивирано од планот Вучиќ да биде интервјуиран за поткастот на Трамп, а не да се меша во надворешните односи или во договор за недвижнини.

‘Дон е домаќин на еден од најголемите политички поткасти во светот и беше во Србија исклучиво во улога на водител на подкаст за интервју’, рече Енди Сурабијан, неговиот портпарол.

‘Тој беше во земјата помалку од осум часа и во ниту еден момент не разговараше со никого за организацијата Трамп’.

Според две лица запознаени со планот на посетата, патувањето го организирал Бред Парскејл, поранешен менаџер на кампањата на претседателот Трамп.

Парскејл сега е извршен директор на конзервативна поткаст и радио компанија, а исто така основа фирма за политичко советување. Му понуди политичко советување на Вучиќ за време на неговата претседателска кампања во 2022, но тврди дека никогаш не бил ангажиран за таа работа.

Вучиќ сега се соочува со еден од најголемите тестови на неговото речиси осумгодишно претседателствување. Протестите против неговата администрација избија во ноември откако бетонска настрешница се урна на железничка станица, при што загинаа 15 луѓе. Демонстрантите делумно ја обвинија владината корупција за несреќата.

Посетата на Трамп Јуниор минатата недела му донесе краток одмор на Вучиќ и веднаш стана главна тема во Србија. Вучиќ и неговите најблиски соработници истакнаа дека тоа е знак на поддршка од администрацијата на Трамп и покрај сѐ позасилените протести на улиците на Белград.

 ‘Срдечен разговор со Доналд Трамп Јуниор, син на претседателот на САД, за билатералните односи меѓу Србија и САД, како и за актуелните теми кои ја обликуваат глобалната политичка и економска сцена’, напиша Вучиќ на социјалните мрежи по средбата.

Српскиот министер за надворешни работи Марко Ѓуриќ во телевизиско интервју по посетата додаде дека „присуството на синот на претседателот Трамп дава голем поттик за одличен почеток на односите со новата администрација“.

Меѓутоа, другите во земјата имаа многу поинаков став.

‘Синот на претседателот Трамп е тука да се обиде да му помогне на Вучиќ’, изјави Драган Јониќ, пратеник на опозициска партија во српскиот парламент. ‘Постои очигледен конфликт на интереси, бидејќи Вучиќ се обидува да ја задржи власта, додека Трампови сакаат да го зачуваат својот договор за недвижнини’.

Владата на Вучиќ минатиот мај потпиша договор со Affinity Global Development, компанија основана од г-дин Кушнер. Компанијата планира да инвестира 500 милиони долари за изградба на хотел со 175 соби, 1.500 луксузни апартмани и други удобности на местото на поранешното министерство во Белград.

‘Возбудени сме што ќе го прошириме нашето присуство во Европа’, рече Ерик Трамп, вториот син на претседателот Трамп, во јануари кога за првпат беше објавена изградбата на хотелот Трамп интернационал како дел од проектот. Ерик Трамп е главниот член на семејството кој ја води Организацијата Трамп.

Меѓутоа, Доналд Трамп Јуниор исто така е и извршен потпретседател на Организацијата Трамп, која управува со семејните хотели, терени за голф и други имоти и помага во планирањето на проектот за српски хотел.

Два извори запознаени со патувањето на Доналд Трамп Јуниор изјавија дека тој не бил платен за оваа посета. Трошоците за неговиот лет, како и за неговата девојка Бетина Андерсон, ги покрива Парскејл, кој има деловен партнер со седиште во Србија. Парскејл одби да коментира или да го открие името на неговиот српски деловен партнер.

Вирџинија Кантер, поранешен советник за етика во Меѓународниот монетарен фонд, рече дека средбата на Доналд Трамп помладиот со српскиот претседател потсетува на активностите на Хантер Бајден, кој беше обвинет од републиканците дека ја користи позицијата на неговиот татко Џо Бајден за профитабилни странски договори.

‘Ова е врв на лицемерието, бидејќи тие беа загрижени за Хантер Бајден, а сега го прават истото’, рече Кантер, кој исто така служеше како етички адвокат во Белата куќа за време на администрацијата на Клинтон.

 ‘Дон Трамп Јуниор, како претставник на неговиот татко, ја користи јавната функција на американскиот претседател за да му помогне на претседателот на Србија да остане на власт – а во исто време ги промовира финансиските интереси на семејството Трамп. Тоа е неетички. Тоа е навредливо’, заклучи таа“, пишува „Њујорк тајмс“.

Останува нејасно колку на Вучиќ му помогнала посетата на Доналд Трамп помладиот. Неколку дена по неговата посета, улиците на центарот на Белград беа преполни со повеќе од 100.000 демонстранти, што организаторите го нарекоа еден од најголемите протести во српската историја.

Минатата година владата на Вучиќ му понуди на семејството Трамп договор за пристап до атрактивно земјиште во центарот на Белград. Владата ја изнајми локацијата на компанијата на Кушнер на 99 години, додека Affinity Global Development соработуваше со Мохамед Алабар, бизнис магнат од Обединетите Арапски Емирати, за да го реализира проектот.

Опозицијата смета дека локацијата на Генералштабот, бомбардирана од НАТО во 1999 година, не треба да биде предадена на американски инвеститори заради профит.

„Она што е незамисливо во Америка станува реалност во Србија“, изјави опозициски пратеник Александар Јовановиќ, пишува „Њујорк тајмс“.