Николовски: Огласот на ЈП „Македонски шуми“ е за времени работни места

Министерот за земјоделство, шумарство и водостопанство Љупчо Николовски вели дека огласот на ЈП „Македонски шуми“ за повеќе од 400 вработувања, е за времено ангажирање лица кои би помогнале да се реализира планираното производство.

Сепак, како што рече Николовски, ова прашање треба да се постави директно во претпријатието кое не е орган во состав на Министерството за земјдоелство.

-Колку јас што знам, тоа е редовна постапка што се прави секоја година. Не може годинава да не се ангажираат доволно луѓе за сеча, дотур или други активности. Тоа се времени вработувања во служба на претпријатието секоја година, па така и оваа. Треба да провериме дали немало претходната, а оваа година се отвораат нови 400 места, напомена Николовски на прес-конференција, одговорајќи на новинарски прашања.

Тој информира дека вчера имал состанок со клучните луѓе на ЈП „Македонски шуми“ за да продолжи трансформацијата на секторот.

-Еден од моите фокуси во овој период ќе биде и шумарството. На мое барање во 2018 и 2019 година секторот прв пат влезе во Програмата за финансиска поддршка. Прв пат се обезбедени средства преку ИПА програмата, објасни министерот, најавувајќи и нов закон за шуми до 31 јули 2022.