Невреме во Битола, заседава општинскиот кризен штаб

Во Битола попладнево силен дожд поплави делови од градот, предизвика прекин на сообраќајот на повеќе сообраќајници, а има и поплавени визби и домови.

Невремето го принуди градоначалникот Тони Коњановски да свика вонредна седница на Општинскиот кризен штаб која е во тек.

Од локалната самоуправа најавија акција на јавните комунални претпријатија, справување со состојбата по обилниот дожд кој престана да паѓа, но најверојатно предизвика штети кои ќе бидат регистрирани.

Општинскиот штаб за заштита и спасување презеде итни мерки за санирање на штетити предизвикани од невремето со обилен дожд што попладнево ја погоди Битола.

На вонредна седница на штабот, градоначалникот Тони Коњановски беше информиран дека првично пријавени се штети од удар од гром на улицата „Караорман“ број 104 в, поплавени се визбени простории на улицата „Ѓорче Петров“, на броевите 21 и 39, поплавени куќи на улица „Дебарска“ бр 99, „Струшка“ бр. 33, „Димитар Мите Богоевски“ бр.6, одрон на патниот правец А3 кај тунелот, како и паднати дрвја на патниот правец Беранци – Вашерејца.

Јавните претпријатија со своите човечки ресурси и механизација се на терен и работат на отстранување на штетите предизвикани од обилните врнежи од дожд.

Граѓаните кои имаат штети, може да ги пријавуваат на телефонскиот број 112 на Центарот за управување со кризи, а Комисијата за проценка на штети, дополнително ќе ја утврди состојбата, соопштија од битолскиот штаб за заштита и спасување.