Неветувачки старт на законот за обвинителство во парламентот


Со само 57 гласа „за“ од вкупно пријавени како присутни 99 пратеници, Собранието, на денешната седница – прва по летната ферија, ја утврди потребата од донесување по скратена постапка на предлог-законот за јавно обвинителство. Тоа значи почеток на расправата за овој владин предлог – закон во собраниските комисии, каде што се можни амандмански интервенции.
Со оваа регулатива треба да се реши и идниот статус на Специјалното јавно обвинителство, но за нејзино донесување е потребно двотретинско мнозинство или најмалку 80 гласови. Но, денеска за потребата од донесување на системскиот закон за јавно обвинителство гласаа само пратеници од парламентарното мнозинство, додека за пратениците од ВМРО-ДПМНЕ, како и од независната пратеничка група, главно, е евидентирано дека не гласале или не биле присутни.
Министерката за правда Рената Дескоска на почетокот на седницата изрази надеж дека сите политички партии ќе смогнат сили да гласаат за овој закон со кој ќе продолжат постапките почнати од Специјалното јавно обвинителство.
– Се надевам дека сите вие ќе смогнете сили да стиснете зелено копче за да го изгаснете пожарот во кој се наоѓаме повеќе години, а тоа ќе значи продолжување на постапките на Специјалното јавно обвинителство во кој гледаме дека имаме индиции и обвиненија за сторен криминал направен од претходната власт, но исто така имаме и стиуација во која е отворен сериозен случај, а тоа е случајот Рекет, кој исто така треба да има сериозна постапка која ќе доведе до завршување насудскиот процес. Треба да има ефикасна правда за сите без оглед на која политичка гарнитура припаѓаат. Пред вас, дали ќе го стиснете зеленото или црвеното копче, треба да ја имате предвид иднината на нашите граѓани, рече Дескоска.
Во пресрет на денешната седница, вчера состанок за Законот одржаа работните групи на власта и на опозицијата, но не беше постигнат напредок по спорните прашања. Министерката за правда Рената Дескоска по средбата изјави дека клучно прашање околу кое не се согласни двете страни е статусот на предметите на СЈО. Од ВМРО-ДПМНЕ најавија дека нивните забелешки ќе ги поднесат во вид на амандмани во текот на комисиската расправа.