Нетанјаху: Израел ќе ја задржи контролата на Газа по војната

Израел ќе ја задржи контролата над Газа на неодредено време по завршувањето на неговата војна против Хамас, изјави Бенјамин Нетанјаху, велејќи дека неговата земја ќе преземе „целосна безбедносна одговорност“ за територијата.

Еден месец по нападот на Хамас во кој загинаа 1.400 луѓе, израелскиот премиер исто така рече дека ќе размисли за едночасовни „тактички мали паузи“ во борбите за да се дозволи влез на помош или излез на заложниците од Појасот Газа, но повторно ги отфрли повиците за прекин на огнот.

Запрашан кој треба да „владее“ со Газа по завршувањето на борбите, Нетанјаху изјави за Еј-Би-Си во интервју емитувано во понеделникот вечерта: „Оние кои не сакаат да го продолжат патот на Хамас“.

Тој додаде: „Израел на неодреден период ќе ја има севкупната безбедносна одговорност [во Газа] затоа што видовме што се случува кога ја немаме таа безбедносна одговорност“.

Неговите коментари понудија најјасна индикација досега дека Израел планира да ја задржи цврстата контрола над територијата на која живеат 2,3 милиони Палестинци.

Обединетите нации и другите светски тела, вклучително и ЕУ, ја сметаат Газа за окупирана – и покрај тоа што Израел ги повлече своите сили од внатрешноста на појасот во 2005 година – бидејќи одржува ефективна контрола врз малата територија по копно, море и воздух.

И Израел и Хамас ги отфрлија зголемените повици за прекин на борбите. Израел вели дека прво треба да се ослободат заложниците. Хамас вели дека ниту ќе ги ослободи, ниту ќе престане да се бори додека Газа е нападната.

Групите за права и експертите на ОН ги обвинија и Израел и Хамас за воени злосторства. Високиот комесар на Обединетите нации за човекови права, Фолкер Турк, во вторникот ја започна петдневната посета на Блискиот Исток, иако сè уште нема обезбедено дозвола од Израел за посета.

„Тоа беше цел месец на масакр, на непрестајно страдање, крвопролевање, уништување, бес и очај“, рече Турк во изјавата. „Прекршувањата на човековите права се во коренот на оваа ескалација и човековите права играат централна улога во изнаоѓањето излез од овој вител на болка“.

Генералниот секретар на ОН, Антонио Гутереш, рече дека Газа станува „гробишта за деца“, повикувајќи на итен прекин на огнот.

Советот за безбедност на ОН се состана зад затворени врати во понеделникот. 15-членото тело сè уште се обидува да договори резолуција, откако четири пати во две недели не успеа да преземе акција. Дипломатите рекоа дека клучна пречка е дали да се повика на прекин на огнот, прекин на непријателствата или хуманитарни паузи за да се овозможи пристап до помошта во Газа.