Нетанјаху до шефот на британската дипломатија: Сами ќе одлучиме како да му одговориме на Иран

Израелскиот премиер Бенјамин Нетанјаху му порача на британскиот министер за надворешни работи Дејвид Камерон дека Израел „сам ќе одлучи“ како да одговори на иранскиот напад.

Нетанјаху рече дека неговата влада „ќе стори сè што е потребно за да се одбрани“. Британската влада се надеваше дека разговорите ќе помогнат да се спречи ескалација, јавува Би-би-си.

Нетанјаху постојано вети дека ќе возврати на невидениот ракетен и беспилотен напад на Иран врз Израел овој викенд.

Камерон: Израел треба да биде паметен
Камерон му рекол дека секој одговор треба да биде „паметен“ и ограничен. По средбата со Нетанјаху во Ерусалим, Камерон им рече на новинарите дека дошол да „покаже солидарност“ по „ужасниот“ напад од Иран.

„Се надеваме дека што и да прави Израел ќе биде ограничено, насочено и колку што е можно попаметно“, продолжи тој. „Не е во ничиј интерес да ескалира и тоа е она што многу јасно им го кажав на сите луѓе со кои разговарав овде во Израел“, додаде Камерон.

Израелскиот премиер по средбата изјави дека Израел самостојно донесува одлуки.

Нетанјаху: Сами ќе одлучиме како да му одговориме на Иран
„Сакам да разјаснам – ние самите ќе ги донесеме нашите одлуки, а државата Израел ќе направи се што е потребно за да се одбрани. Изјавата на Нетанјаху ќе го зајакне верувањето во западните престолнини дека Израел е подготвен да му возврати на Иран.

Камерон подоцна ќе отпатува на состанокот на министрите на Г7 во Италија каде ќе се заложи за координирани санкции кон Иран.

Тој претходно го обвини Техеран дека стои „зад толку многу малигни активности“ на Блискиот Исток и ги повика другите земји да преземат мерки за ограничување на влијанието на Иран.

САД и ЕУ размислуваат за дополнителни санкции, а Израел ги повикува своите сојузници да го назначат Корпусот на иранската револуционерна гарда (IRGC), главната воена, политичка и економска сила во Иран, како терористичка организација.