Несреќа во Јужноафриканската Република: 11 загинати при пад на лифт во рудник

Најмалку 11 лица загинаа, а 75 се повредени при пад на лифт кој превезувал работници во рудник за платина во Јужна Африка, соопшти администрацијата.

Компанијата „Импала платинум“ соопшти дека привремено ја прекинала работата во рударскиот комплекс во Рустенбург, по несреќата што се случи синоќа, пренесува Ројтерс.

Повредените работници се префрлени во болници, додава АП. Извршниот директор на „Импала платинум холдингс“, Нико Милер изјави дека тоа е „најтемниот ден во историјата“ на компанијата.

Истрагата за тоа што доведе до пад на лифтот е започната, се додава во соопштението на компанијата.

Јужноафриканската Република е најголемиот светски производител на платина.