Неограничено уживање со рок и класична музика: Стоечки овации за виолинистот Дејвид Гарет

На дожд, во оган, на морски бранови, низ историјата, во вселената…два часа неограничено уживавме на ексклузивниот јубилеен концерт на славниот кросовер виолинист Дејвид Гарет (38), синоќа, во А1 Арената во Скопје.

„Ѓаволскиот виолинист“ од нашата ера, меѓународна суперѕвезда која ги заматува линиите меѓу Моцарт и „Металика“ ни приреди спектакуларно шоу со виртуозно свирење на целиот бенд, со фантастични светлосни и визуелни ефекти, досега невидени на овие простори, и со шармантно но професионално однесување.

Облечен едноставно, цела вечер со широка насмевка, Гарет, дипломец на престижниот „Џулијард“ во Њујорк , синоќа со виолината не прошета низ најатрактивниот поп и класичен репертоар, кој беше мелем за душа за многубројната публика која не престана да снима и да фотографира со мобилките.

Атрактивниот музичар, своевремено манекен на „Армани“, започна моќно, со дел од Петтата симфонија на Бетовен, продолжи романтично, со насловната тема од серијалот филмови „Пиратите од Карибите“, а веднаш потоа, на сцена стапија „Металика“, „Еј-Си/Ди-Си“, „Нирвана“, Стиви Вондер, Принс, Мајкл Џексон, „Аеросмит“, „Колдплеј“, Клод Дебиси, Ачатуријан… за да заврши со еден бис, со „Битлси“.

„Оваа турнеја ми е посебна, затоа што со вас славам десет годишен јубилеј како дел од светската турнеја „Неограничено“, според новиот албум „Неограничено во живо“ (UNLIMITED-GREATEST HITS-LIVE).  На претходната турнеја, немавме цел бенд, немав пари да платам тапанар. Седевме во едно мало студио и сонувавме дека еден ден ќе станеме вистински бенд кој свири насекаде низ светот. Сонот ни се оствари“, рече миленикот на женската публика кој во текот на вечерта се симна од сцената, се прошета меѓу своите фанови, а даваше и автограми.

Гарет кој два дена беше во Скопје, го прошета главниот град, а и проба од специјалитетите тавче-гравче и турлитава.

Неговите албуми се продаваат во милионски тиражи, а има добиено 24 златни и 16 платинести награди ширум светот. Свири на виолина „страдивариус“ од 1710 и на „џовани батиста гвадањињи“ од 1772 година.

По татко Германец (со презиме Бонгарц), а по мајка Американец, тој е чудо од дете -имал само 4 години кога почнал да свири виолина. Веќе на 9 години и со тим на менаџери зад себе, свири соло концерти со водечки интернационални оркестри, како што се Лондонската филхармонија, Филхармонијата на Лос Анџелес и Рускиот национален оркестар и го привлекува вниманието на светските професори за музика и диригенти како Зубин Мехта, Клаудио Абадо и Михаил Плетњев. Дури има свирено и под диригентската палка на легендарниот Јехуди Мењухин.

Концертот во Скопје го организираше продукција „Прагма“.

Лејла Сабит       Фото: Борис Грданоски