„Недела“ на Ермис Лафазановски објавена на руски

Во Москва деновиве излезе од печат романот „Недела“ на Ермис Лафазановски.

Тоа е петто дело од македонски автор обjавено (како и претходните „Вежби за ибн Пајко“ на Оливера Николова, „Азбука за непослушните“ на Венко Андоновски, „Разговор со Спиноза“ на Гоце Смилевски и „Дива лига“ на Влада Урошевиќ) во превод на руски од Олга Панкина во рамките на проектот „Сто словенски романи”.

Проектот го реализира Форумот на словенските култури со цел зближување на словенските народи.

Издавач на „Недела“ е Центарот за книга „Рудомино“. Овој реномиран руски издавач ја обезбедува и натамошната дистрибуција на книгите на големото руско јазично подрачје.

Творештвото на Ермис Лафазановски им е познато на руските читатели благодарение на преведените од Олга Панкина на руски неколку негови раскази и роман „Храпешко“ cо коj во 2014 година Центарот за книга „Рудомино“ успешно jа започна книжевната едициjа „Македонскиот роман на 21 век“.