Не одете во Европа, таму е страшно и нездраво: порака до сограѓаните од шефот на руската ЦИА
Сергеј Наришкин вели дека во Европа имало биомеханоиди и перверзии, а сопругата и ќерката постојано се во европските градови и летовалишта
Модерна Европа не може да биде привлечна за „здрав човек“, изјави директорот на Службата за надворешно разузнавање Сергеј Наришкин на конференцијата во Москва за меѓународна безбедност.
„За духовно и физички здрава личност, всушност е непријатно, а понекогаш дури и страшно, да се дојде во Европа – толку многу различни видови на перверзии се размножија таму“, рече тој.
Наришкин ги предупреди Русите да не патуваат во европските земји, бидејќи, според него, таму се во опасност. „Човекот е создаден според божјиот лик и подобие, а западњаците се обидуваат да го заменат со секакви трансродови луѓе и биомеханоиди“, забележа Наришкин.
Во врска со ова, директорот на Службата за надворешно разузнавање ја критикуваше изјавата на шефот на европската дипломатија, Жозеп Борел, во која тој ја спореди Европа со цветна градина, а остатокот од светот со џунгла, иако самиот западен функционер потоа се извини за оваа фраза.
Забележливо е дека членовите на семејството на директорот на Службата за надворешно разузнавање претпочитаат одмор во Европа. Во април оваа година, неговата сопруга Татјана Наришкина беше забележана во Париз. Сопругата на главниот руски разузнавач е фотографирана во автомобил „мерцедес“ од 100.000 долари од класа Ц, сопственост на руската амбасада.
Ќерката на Наришкин, Вероника, ги сака одморалиштата во Грција и Италија, а минатото лето отиде во Турција, земја на НАТО. Членовите на семејството на шефот на Службата за надворешно разузнавање сè уште не се под санкции на ЕУ, иако самиот Наришкин беше на црната листа по анексијата на Крим во 2014 година. Потоа тој беше претседател на Државната дума.