Не биле шпекулации: ЕУ останува на правилата за превозниците

Министерството за транспорт денеска им порача на медиумите да не наседнуваат на „шпекулации“ откако подгорички „Вијести“ објавија дека не бил постигнат договор меѓу Европската комисија и превозниците од Западен Балкан да се олабави правилот за престој 90/180. Европската комисија засега не покажува подготвеност да ги задоволи барањата на професионалните возачи поврзани со подолг престој во Шенген зоната за нивните професионални потреби.

„Партнерите од Западен Балкан се охрабруваат да ги искористат одредбите за долгорочни визи и дозволи за престој или флексибилноста предвидена во Шенгенските правила, особено во однос на правилата за прекугранични работници“, изјави портпаролот на Европската комисија, Гијом Мерсие,  пишува Радио Слободна Европа.

Шенгенските правила им дозволуваат на патниците максимум 90 дена престој во кој било 180-дневен период на целата територија на Шенген зоната. Ова ги вклучува и државјаните на кои не им е потребна виза за влез. Периодот од 180 дена е таканаречен „ролирачки“ прозорец, што значи дека секој ден престој се брои 180 дена наназад за да се осигури дека ограничувањето од 90 дена не е надминато.

Принципот на прекуграничните работници е дека социјалното осигурување се плаќа во земјата каде што се извршува работата.

Минатата недела се одржа состанок помеѓу Европската комисија и земјите од Западен Балкан на ниво на работни групи. Сепак, како што објасни портпаролот на Мерсија, овој состанок ѝ овозможи на европската страна повторно да ги разјасни постојните Шенгенски правила. Следниот состанок е закажан за 23 февруари.

Подгоричкиот весник „Вијести“ објави дека Европската комисија ги отфрлила сите предлози испратени од земјите од Западен Балкан со цел да се најде компромис за ограничување на престојот на превозниците на товар од земјите од регионот во земјите од Шенген. Оваа информација внесе тревога не само кај македонските туку и кај регионалните превозници.

Од македонското Министерство за транспорт нагласуваат дека сите можности се разгледуваат од страна на техничка работна група составена од сите ресорни министерства и претставници на Европската комисија.

Превозниците предложија професионалните возачи да добијат различни визи или сличен документ што ќе им овозможи да останат подолго и да работат во ЕУ без да го променат своето живеалиште, или нивното работно време според патните налози што ги преведуваат при транзит низ ЕУ да не се смета во времето на нивниот престој…

„Претставниците на ЕК рекоа дека сите предлози се невозможни, не се во согласност со Шенген. На нашето прашање, ако веќе ги отфрлаат сите наши предлози, каков е нивниот предлог, одговорот беше дециден ‘возачите и превозниците мора да се прилагодат на правилото 90/180’“, изјави за „Вијести“ еден од учесниците на последниот состанок.

„Во следниот период разговорите продолжуваат со засилена динамика со цел наоѓање трајно решение кое е прифатливо за сите страни. Како Министерство апелираме да не се потпаѓа на шпекулации и секаков вид непроверени информации кои може да наштетат на дијалогот. Особено не на шпекулации од соседните држави. Секоја држава одлучува за себе. Македонија продолжува со дијалог за трајно решение“, се вели во денешното соопштение од македонското Министерство за транспорт.