НБ светски лидер според застапеноста на жените на раководни места, според Британскиот форум на монетарни и финансиски институции
Британскиот официјален форум на монетарни и финансиски институции (ОМФИФ), годинава ја рангира Народната банка како прва во светот меѓу централните банки и финансиските институции според застапеноста на жените на раководни позиции.
Ова, како што информираат од Народната банка, е дел од објавата посветена на Индексот на родова еднаквост во финансиските институции за 2022 година, со кој веќе десет години по ред се рангираат финансиските институции според родовата застапеност.
Во објавата за застапеноста на жените во раководните структури на Народната банка се истакнува дека 70 проценти од раководните позиции во Народната банка ги извршуваат жени.
На листата на централни банки на ОМФИФ со најголема застапеност на жените на раководни позиции се најдоа и федералните резерви на Сан Франциско, Чикаго, Минеаполис и Кливленд, централните банки на Австралија и Норвешка, а од регионот и Србија.
– Во извештајот се наведува дека во светот само 22 жени се на чело на централните банки (за една повеќе во однос на претходната година) и оваа состојба е практично непроменета во однос на 2013 година кога за првпат беше поставен овој индекс, што говори за многу бавни промени на ова поле во светот на финансиите, се наведува во соопштението од Народната банка.
Индексот на ОМФИФ ја мери родовата еднаквост во 336 институции, меѓу кои 186 централни банки, 50 пензиски фондови, 50 суверени фондови и 50 комерцијални банки во светот, во согласност со застапеноста на мажите и жените меѓу вработените, стажот, како и позицијата што ја имаат во организацијата. Според последните податоци, родовата еднаквост се подобрува во сите набројани институции, но многу бавно за 1 до 2 поена, а најдобар резултат имаат пензиските фондови. Од 336 институции само 14 проценти се предводени од жени, што е минимално подобрување на резултатот во однос на 2021 и 2022 година (13,3 и 13,7 проценти). Во извештајот се наведува дека со ова темпо ќе бидат потребни 140 години за да се надмине овој јаз помеѓу мажите и жените.