Научна студија ги пресмета економските последици од Ковид-19
Студија објавена во списанието „PLOS ONE“ покажува дека пандемијата со Ковид-19 ја чинела светската економија дури 3,8 билиони долари и оставила без работа 147 милиони лица. Истражувањето било финансисано од страна на австралискиот совет за истражување АРЦ, а на меѓународната студија за влијанието на пандемијата врз глобалната економија учествувале голем број научници ширум светот, предводени од Универзитетот во Сиднеј, пренесува СЕЕбиз.
Во моментот кога бил подготвуван текстот во светот имаше 12.462.531 случаи на инфекција со корона вирус и 558.795 смртни случаи, но покрај овие бројки поврзани со здравјето на луѓето, пандемијата има и економски последици, кои според многумина со уште поголемо негативно влијание врз планетата.
Добар дел од тие 3,8 билиони американски долари биле за спроведување на мерките за намалување на ширењето на вирусот, како и на економските мерки за да им се помогне на компаниите и поединците на кои им е забрането да вршат бизнис. Најпогоден сектор од пандемијата е транспортната индустрија, а трговијата, туризмот, енергетиката и финансиите, особено во Азија, Европа и САД, претрпеа и продолжуваат да имаат големи последици.
Студијата укажува дека единствената позитивна страна е влијанието врз животната средина, што резултираше со најголем пад на емисиите на стакленички гасови во историјата.
Околу 2,1 билиони долари изнесува загубата од неисплаќање на плати, а 536 милијарди долари е заради намалувањето на меѓународната трговија.
Глобалната економска состојба и постојните загуби на работни места наскоро ќе влијаат на квантитетот и квалитетот на работењето, како и на ранливите групи вработени како мигрантите и неквалификуваните работници кои не можат да се прилагодат на работа во виртуелна средина.
Покрај тоа, ќе се прошири јазот помеѓу богатите и сиромашните и целосно може да ги сруши здравствените системи во земјите со пониски приходи.
Во однос на животната средина, пандемијата има направено навистина добра работа, бидејќи ги намали штетните емисии за 2,5 гигатони, или околу 4,6 проценти од вкупните емисии на стакленички гасови во светот. Покрај тоа, забележан е пад на опасните честички PM2.5 за 2,8 проценти и сулфур диоксид за 2,9 проценти.
Еден од авторите на оваа студија, д-р Арунима Малик, вели дека ова е најголемиот економски шок од Големата депресија, кога глобалната економија потона за 15 проценти, додека најголемиот пад на емисиите на стакленички гасови во историјата доведе до значително намалување на смртните случаи од загадување, што друга студија еден ден исто така може да направи пресметки.
Студијата исто така покажа дека поради пандемијата, на 3 милијарди луѓе им било речено да останат дома, од кои повеќе од една милијарда луѓе завршиле во изолација само во Индија.
За да се спроведе оваа студија, истражувачите користеле податоци од 38 региони во светот и 26 индустриски сектори, кои на различни начини претрпеле економски последици од пандемијата, како на пример загуби во земјите на ОПЕК затоа што тие не извлекоа доволно нафта заради намалената побарувачка во транспортниот сектор.
Што се однесува до точноста на резултатите од оваа студија, потпретседателот на универзитетот во Сиднеј, д-р Мајкл Спенс, вели дека нивната работа е овозможена од таканаречената платформа за соработка „foot print“ која ја основале пред десетина години и која денес им овозможува брзо и сигурно симулирање на светската економија со цел да се види како општеството и околината влијаат врз нашата потрошувачка.
Истражувањето е спроведено во глобална лабораторија во облак (клауд) МРИО, каде се собрани сите податоци од меѓународна соработка, што потоа овозможи со компјутерски модел да се дојде до бројките за кои научниците веруваат дека се многу точни.