НАТО: Не може да има неказнивост за воените злосторства на Русија

„Русија сноси единствена одговорност за својата агресивна војна против Украина, што е очигледно кршење на меѓународното право, вклучително и Повелбата на ОН. Не може да има неказнивост за злоупотребите и кршењето на човековите права од страна на руските сили и официјални лица, воените злосторства и други прекршувања на меѓународното право“, стои во заклучоците на лидерите на земјите членки на НАТО усвоени денес на самитот во Вашингтон..

„Русија е одговорна за смртта на илјадници цивили и предизвика голема штета на цивилната инфраструктура. Најостро ги осудуваме ужасните напади на Русија врз украинскиот народ, вклучително и врз болницата на 8 јули. Русија мора веднаш да ја прекине оваа војна и целосно и безусловно да ги повлече сите свои сили од Украина во согласност со резолуциите на Генералното собрание на ОН. Никогаш нема да ги признаеме руските нелегални анексии на украинска територија, вклучувајќи го и Крим.Исто така, ја повикуваме Русија да ги повлече сите свои сили од Република Молдавија и Грузија, стационирани таму без нивна согласност“, порачуваат лидерите на НАТО.

Според нив, Русија настојува суштински да ја реконфигурира евроатлантската безбедносна архитектура.

„Заканата од сите домени што Русија ја претставува за НАТО ќе опстојува на долг рок. Русија ги обновува и ги проширува своите воени капацитети и продолжува со кршењето на воздушниот простор и провокативните активности. Ние стоиме во солидарност со сите сојузници погодени од овие акции. НАТО не бара конфронтација и не претставува закана за Русија. Остануваме подготвени да одржуваме канали за комуникација со Москва за да го ублажиме ризикот и да спречиме ескалација.

Ја осудуваме и руската неодговорна нуклеарна реторика и присилното нуклеарно сигнализирање, вклучително и нејзиното најавено стационирање на нуклеарно оружје во Белорусија, кое демонстрира став на стратешко заплашување. Русија го зголеми своето потпирање на системите за нуклеарно оружје и продолжи да ги диверзифицира своите нуклеарни сили, вклучително и со развивање на нови нуклеарни системи и распоредување на ударни способности со краток и среден дострел со двојна способност, а сето тоа претставува растечка закана за Алијансата. Русија ги прекрши, селективно спроведе и се оддалечи од долгогодишните обврски за контрола на оружјето, со што ја поткопува глобалната архитектура за контрола на оружјето, разоружување и неширење. Ние се спротивставуваме на какво било поставување на нуклеарно оружје во орбитата околу Земјата, што би го прекршило членот IV од Договорот за вселената и сериозно ќе ја загрози глобалната безбедност. Ние сме длабоко загрижени од пријавената употреба на хемиско оружје од страна на Русија против украинските сили“, стои во „злосторничкото досие“ за Русија.