Наскоро првиот милијардер Ром во светот: И Блер на листата

Британски Сандеј Тајмс денеска објави листа на најбогати луѓе во земјата, со оценка дека бројот на милијардери во Велика Британија се намалува и дека британскиот „милијардерски бум“ завршува.

Списокот открива дека бројот на милијардери опаднал оваа година, од 177 во 2022 година на 165 ултрабогати оваа година.

Заедничкото богатство на 350-те најбогати поединци на листата е повеќе од 795 милијарди фунти, но Сандеј Тајмс наведува дека само времето ќе покаже какво влијание ќе има падот на бројот на британските милијардери.

„Ќе треба да почекаме и да видиме дали сега го достигнавме врвот на милијардери и што значи тоа за нашата економија“, рече Роберт Вотс, кој ја состави листата.

На врвот на листата е британско-индискиот бизнисмен Гопи Хиндуџа и неговото семејство, чие богатство од 37,2 милијарди фунти е најголемо во историјата на рангирањето на Sunday Times.
Другите познати имиња на листата забележаа пад на нивното богатство, а вкупната нето вредност на основачот на Вирџин, Ричард Бренсон, падна за 2,4 милијарди фунти.

Џим Ретклиф, кој годинава купи удел во Манчестер Јунајтед, падна за две места, а неговото богатство е за 6,1 милијарди фунти помалку.

На листата на милијардери се приклучува и Пол Макартни, кој стана првиот британски музичар кој го постигнал статусот откако го зголемил своето богатство за 50 милиони фунти.

Најголем раст забележа семејството Барнаби и Мерлин Свајр, сопственици на компанијата Swire, а вредноста на оваа 200-годишна компанија е 8,8 милијарди фунти.

На листата се најде и Јуан Блер, најстариот син на поранешниот британски премиер Тони Блер.

Обединетото Кралство продолжува да се соочува со криза на трошоците за живот, а новите бројки оваа недела откриваат дека рекордни 3,1 милиони пакети со храна биле доделени во рок од една година.

Британскиот претприемач Алфи Бест наскоро ќе биде првиот ромски милијардер во светот
Британскиот претприемач Алфи Бест со богатство од 947 милиони фунти е на пат да стане првиот ромски милијардер во светот.

Овој 54-годишник, најбогатиот Ром во Велика Британија, е основач на синџир на станбени комплекси и одморалишта, а неговото богатство се зголемило за 202 милиони фунти, пренесува британскиот портал Сан.

И покрај финансискиот успех во Велика Британија, Бест во април оваа година реши да ја напушти земјата и да замине да живее во Монако како „даночен бегалец“.

„Британија треба да се разбуди, ние ги губиме нашите креатори на богатство. Нашиот даночен систем и деловните регулативи го стерилизираат малиот број луѓе кои ја градат економијата“, рече Бест.

Тој оцени дека излегувањето на Велика Британија од Европската унија е „златна можност“ да се создаде брзо растечка средина која е погодна за претприемачите, но дека оваа можност е „целосно потрошена“.

„Мислев дека Риши Сунак ќе биде како друг Исус за нашата земја. Колку згрешив“, додал Бест.

Богатството на Бест од 947 милиони фунти вреди околу 1,2 милијарди американски долари.