Народна банка: Клубот на истражувачите ја одржа 47. сесија

 Во Народната банка се одржа 47. сесија на Клубот на истражувачите на која беше презентиран научниот труд „Студија на настан за реакцијата на балканските берзи на конфликтот меѓу Русија и Украина“ од авторите Горан Мојаноски и Весна Буцевска.

Сесијата ја отвори вицегувернерката на Народната банка, Ана Митреска, која посочи дека презентираниот труд е особено значаен, бидејќи се осврнува на геополитичка тема којашто е моментално релевантна како за домашната економија, така и за економиите во регионот.

Целта на трудот „Студија на настан за реакцијата на балканските берзи на конфликтот меѓу Русија и Украина“ е да се испита реакцијата на берзите во Југоисточна Европа од вооружениот конфликт. Со помош на примерок од седум берзански индекси, методологијата за студија на настан се применува за да се испита влијанието на конфликтот меѓу две европски земји врз берзанските индекси на пазарите во развој во Југоисточна Европа. 

Резултатите покажуваат дека почетокот на конфликтот кон крајот на февруари придонесол за значителна корекција на цените и берзите во анализираните земји станаа максимално променливи и подложни на лесни и брзи промени на дневно ниво. Со помош на наодите се истражува економското влијание на вооружениот конфликт, преку обезбедување емпириски докази дека конфликтот меѓу двете европски земји, коишто не се членки на Европската Унија, придонесува за прелевање на ефектите врз берзите на други европски земји (и на оние коишто се и на оние коишто не се членки на Европската Унија). Овие наоди имаат големо влијание за диверзификација на портфолиото и можат да помогнат при одлуката за распределба на средствата на инвестициските менаџери.

По презентацијата, на сесијата се разви дискусија меѓу учесниците поттикната од презентацијата на трудот и од изнесените заклучоци. Следната сесија на Клубот на истражувачите е планирана за во септември.