Најмалку шест лица загинати во несреќата во хемиската фабрика во Словенија

Бројот на загинатите во несреќата што вчераутро се случи во хемиската фабрика во Кочевје, Словенија, се зголеми на шест, откако синоќа во љубљанскиот клинички центар почина еден од двајцата работници кои се здобија со тешки изгореници во експлозија и пожарот потврди директорот, Сречко Стефаниќ, јавуваат медиумите во регионот.

Се очекува денеска полицијата да излезе со првите резултати од истрагата за несреќата, но од компанијата проценуваат дека настанала поради човечка грешка.

Причина за трагичниот настан најверојатно е човечката грешка на еден од вработените, која се случила при испумпување на суровини во складишниот простор, изјави вчера Стефаниќ, додавајќи дека дошло до трагична конфузија, односно замена на две суровини.

Во несреќата загина едно лице вработено во Меламин, компанија за производство на меламински смоли кои се користат во хемиската и градежната индустрија и петмина вработени во компанија од Љубљана кои морале да поправаат електрични инсталации во областа каде што се случила експлозијата.