Надежта се крие во секој од нас (галерија)

Вечерва на полноќ надежта ќе го гушне стравот. Календарски ќе и кажеме збогум на 2020, а симболично ќе ѝ посакаме добредојде на новата 2021 година. Секоја година, токму на 31 декември се радувавме на дочекот на Новата,  а сега во нашите мисли сакаме што побрзо да ја испратиме 2020, една од најтешките во цел свет.

На залезот од оваа тешка година, лошите работи ќе ги премолчиме, а добрите ќе ги повториме, со цел да ги пренесеме во новата, се уште непозната 2021.

Елката на скопскиот плоштад или во домашен амбиент, оваа вечер ќе биде богато украсената дама околу која ќе се вртиме, ќе ги редиме подароците, ќе си честитаме на полноќ и ќе си посакаме многу желби, мали или големи, остварливи или неостварливи, ама на прво место здравје, на најблиските но и на целата заедница.   

Само еден поглед на елката и веќе се чувствуваме поубаво, една година помлади, а не постари, го чувствуваме мирисот на празниците, на цимет, на печени или варени костени, на греано вино или на топол чај.

Фотогалеријата на нашиот фотограф ја раскажува новогодишната приказна на Скопје еден час пред полноќ.

Среќна нова 2021!