Надал стигна до финалето на Ролан Гарос по лошата и болна повреда на Зверев
Германецот го изврте стапалото обидувајќи се да стигне до една топка и во големи болки беше однесен во инвалидска количка за после да се врати на патерици и да го предаде мечот
За Рафаел Надал тоа беше тесно, натпреварувачко и долго полуфинале на Отвореното првенство на Франција во петокот, кога неговиот противник, третиот носител Александар Зверев, истрча десно за да стигне една топка и го изврте десниот зглоб. Зверев падна на земја, плачејќи во агонија и стегајќи ја потколеницата.
Неговата црна облека, рацете и нозете беа премачкани со глина во боја на ‘рѓа, на Зверев му помогна лекар, а потоа го одведоа од теренот во инвалидска количка. Неколку минути подоцна, Зверев се врати на теренот „Филип Шатрие“ со патерици, со соблечена десна патика и го предаде мечот, не можејќи да продолжи.
Ненадејниот крај на натпреварот кој веќе помина 3 часа, а не беа ни два полни сета, му овозможи на Надал да стане, на неговиот 36-ти роденден, вториот најстар машки финалист во историјата на Отвореното првенство на Франција. Сега ќе се обиде да стане најстариот шампион на турнирот кој веќе го има освоено рекордни 13 пати.
„Да се биде во финалето на Ролан Гарос е сон, без сомнение“, рече Надал за време на интервјуто на теренот, а потоа откри дека бил со Зверев кога плачел во мала соба на стадионот.
„Многу тешко, нели? И многу тажно за него, искрено, нели?“ му кажа Надал на полниот стадион од 15.000 гледачи кои гласно се обидуваа да го бодрат во текот на целиот натпревар, извикувајќи „Ра-фа!“ постојано.
Со звукот на дождот кој се слушаше на затворениот покрив што се извлекува на теренот „Филип Шатрие“, Надал успеа да победи најтесно што може во исцрпувачкиот прв сет кој траеше еден и пол час со резултат 7-6 (8) . Вториот сет исто така одеше кон кон тајбрејк по уште еден и пол час кога Зверев падна зад основната линија и загуби поен што му овозможи на Надал да стигне до 6:6.
Лекарот излезе да го види, а Надал ја обиколи мрежата за и тој да го провери Зверев. Откако Зверев се врати на теренот за да каже дека ќе треба да се повлече од натпреварот, тој ја подаде раката на судијата на столот, а потоа го прегрна Надал.
Надал се соочуваше со хронична болка во левото стапало и имаше пар победи од кои секоја траеше повеќе од 4 часа – вклучувајќи го и неговото четвртфинале против бранителот на титулата Новак Ѓоковиќ кое заврши во 1:15 часот во средата – но не покажа знаци на возраст, повреда или замор против 25-годишниот Зверев.
Покрај 14. трофеј од Отвореното првенство на Франција, Надал може да ја освои својата 22. Грен слем титула за да го додаде на машкиот рекорд што веќе го има по неговиот триумф на Австралија Опен во јануари. Ѓоковиќ и Роџер Федерер се изедначени на 20.
„Знам колку многу се бори да освои Грен слем, но во моментот немаше многу среќа“, рече Надал. „Единственото нешто за кое сум сигурен е дека тој нема да победи на еден – туку на многу повеќе од еден. Затоа му посакувам сѐ најдобро и многу брзо закрепнување“.
Можеби, само можеби, беспрекорните услови во она што беше претворено во затворена арена му помогнаа на Зверев да го извлече најдоброто од себе стигнувајќи до речиси двојно повеќе винери од Надал, 40-21.
Немаше ветар за грижа, немаше сончева светлина или сенки, немаше топлина или студ што ја троши енергијата. Сѐ до неочекуваната лоша повреда. (АП)