На море во Дојран (галерија)
Во стар чун или под сламен чадор, на кејот или со крапче во чинија, ќе уживаме ова лето во Дојран како на море. Досегашната практика, да се преспие во Дојран пред да се замине во Грција ќе почека до отворање на границите и за нас,и за туристите од регионот, а дотогаш ќе се капеме во топлото езеро и ќе уживаме во изборот на голем број плажи, ресторани и кафулиња, на дистанца, со почитување на мерките и носење на заштитни маски.
И за време на карантинот, и сега, за викендите, а за некои и избор за годишен одмор, Дојран останува привлечна дестинација каде можете поевтино да поминете со мирисот на морето, отаде границата.
Во Дојран минатиот месец со засилено темпо се изведуваа работите за санација на оштетениот дел од крајбрежјето на Дојранското езеро каде на потегот од плажата ЕЛЕМ до „Стара Мрдаја“, се уредуваа нови плажи и разурнатиот дел од рекреативната патека.
И традиционалниот „Д фестивал“ кој требаше деновиве да се одржи, е одложен за август.
Ви пренесуваме дел од амбиентот викендов во Дојран, благодарејќи на фото-галеријата на нашиот фоторепортер Борис Грданоски.