На Комисијата за заразни болести присуствувале и претставници на средношколците

Фото: Б. Грданоски

На состанокот на Комисијата за заразни болести утрово присуствуваа и претставници од Сојузот на средношколци. На редовната координација, од страна на претставниците на комисијата им беа презентирани извештаите со деталната состојба од ковид-19 во Македонија.

На состанокот, претставниците на Сојузот на средношколците ги претставија барањата на учениците, од кои најголем дел веќе се во планот на Комисијата за заразни болести за почеток на учебната година. Она што беше, пред сѐ, предмет на дискусија, е периодот на имплементација на одредени протоколи, за кои Комисијата инсистира да бидат имплементирани етапно, согласно епдидемиолошката состојба во земјата.

Министерот за здравство Венко Филипче пред средношколците го објаснуваше процесот на воведување и попуштање на рестриктивните мерки согласно епидемиолошката состојба. Тој информираше дека сите мерки за превенција донесени врз основа на стручните анализи и препораки на Комисијата во интерес на заштитата на здравјето на децата и родителите.

На состанокот двете страни се заложија да продолжат со интензивна комуникација, со цел добра организација и имплементација на мерките за спроведувањето на наставата во претстојната учебна година.