На Германија ѝ недостасуваат дури 560.000 работници во обновливата енергија

Германија има амбициозни климатски цели – да постигне јаглеродна неутралност до 2045 година, па дури и негативни емисии по 2050 година. Но, голем предизвик стои на патот кон позелена иднина: недостаток на квалификувани работници.

Со буџет од 500 милијарди евра за инфраструктурни планови, од кои 100 милијарди евра се наменети за Фондот за клима и трансформација, Германија јасно ја покажа својата посветеност на зелената транзиција. Сепак, студијата на Германската индустриска и трговска комора (DIHK) предупредува на загрижувачки дефицит од дури 560.000 работници во 250 клучни професии неопходни за енергетската транзиција. Само во секторите за сончева енергија, ветер и водород, ќе бидат потребни дополнителни 300.000 квалификувани работници во следните десет години.

Овој недостиг отвора значајни можности за студентите и младите професионалци, бидејќи, како што истакнува порталот Studying-in-Germany.org, наоѓањето програми што обучуваат за работа во „зелените“ сектори е од суштинско значење за идна кариера и придонес во борбата против климатските промени.

Иако 21 процент од германската работна сила веќе извршува работни места со еколошка компонента, во некои области има особено голема побарувачка. Тука спаѓаат енергетските системи, каде што се барани специјалисти за обновлива енергија, индустрискиот сектор, особено во производството на челик и тешката индустрија, како и градежништвото и урбаниот развој со потреба од планери и инженери со знаење за одржливост. Секторот за мобилност и транспорт бара експерти за електрични возила и станици за полнење, додека дигиталната технологија и податоците имаат потреба од аналитичари и софтверски инженери за поддршка на зелените иновации.