МЗ: На инфективните одделенија во земјава се лекуваат 826 пациенти, има слободни места

Во изминатите 24 часа во ковид центрите во болниците низ земјава е пријавено дека се лекуваат вкупно 826 пациенти позитивни и суспектни на корона вирусот, слободни места има, информираат од Министерството за здравство.

По извештаите на болниците, кои пристигнуваат во Министерството за здравство на дневна основа, во болницата во Битола се хоспитализирани 74 пациенти позитивни и суспектни на Ковид-19, во болницата во Штип 56 пациенти, на инфективното одделение во Тетово има 43 пациенти, во Велес се лекуваат 70 болни, а во Куманово 106 пациенти позитивни и суспектни на КОВИД-19. Во ковид центарот во Охрид има хоспитализирано 105 пациенти, во Прилеп 116, во ковид центарот во Гостивар 47, а во Струга 31 заболен. Во болницата во Струмица хоспитализиран е 91 пацинет, во Кочани 21, во Кичево 18, во Кавадарци 39, а во Гевгелија 9 лица позитивни на коронавирусот, стои во соопштението од МЗ.

Од министерството посочуваат дека бројките се менуваат од час во час, според направените приеми и исписи на пациенти.

– Вкупната бројка на пациенти позитивни и суспектни на корона вирусот, кои се лекуваат на инфективните одделенија во главниот град и во болниците низ земјава е 1.285 и има околку 120 празни болнички кревети во ковид центрите, информираат од МЗ.

Во тек на денот, информираат од МЗ, се прават и исписи на оздравени пациенти, со што ќе се ослободат дополнителни легла.

Од МЗ, посочуваат дека сите одделенија на клиничките болници располагаат со болнички места до кои има довод на кислород, како и дека покрај големиот наплив на пациенти во изминативе десетина дена, Министерството е во постојан контакт со сите болници и доколку има потреба, капацитетите на ковид одделенијата ќе бидат дополнително проширени.