МВР ги нарече невистини тврдењата на Чулев, тој прави алиби за лажните обвинувања на Мицкоски

Министерството за внатрешни работи категорично ги отфрла сите невистини пласирани на денешната прес конференција на ВМРО-ДПМНЕ од страна на Наќе Чуле и го повика да го покаже архивското бројче од актот, со кој тврдат дека го пријавиле протестот, со наводно однапред позната маршрута на движење и точки на застанување. Таква пријава во МВР не постои, велат од оваа институција. 

-Согласно член 3 од Законот за јавни собири, известувањето се поднесува во подрачната единица на МВР на чие подрачје се одржува јавниот собир и во него е наведен организаторот на протестот со сите преземени мерки во врска со непречено организирање на протестот.
Но, таков документ со архивски број нема, бидејќи таков акт не постои. Екс-министерот за внатрешни работи точно знае дека согласно законот, организаторот кој го пријавил протестот може да сноси и одговорност за активностите кои се случуваат на истиот.

Оперативниот план на МВР со мерки и активности е изготвен согласно оперативните сознанија на полицијата, а не според изнесените дезинформации за уредно најавен протест и благодарение на тој план, со брза реакција на полицијата беа избегнати поголеми инциденти, а досега се приведени 20 лица, од кои против 12 веќе се поднесени кривични пријави, порачаа од МБР. 

Претходно Наќе Чулев од ВМРО-ДПМНЕ излезе со соопштение во кое тврдеше дека министерот Оливер Спасовски треба кривично да одговара и да си поднесе оставка бидејќи не водел грижа за безбедноста на граѓаните учесници во протестот.

 

-Од овие причини и непреземање на мерки и активности дојде до сериозно нарушување на јавниот ред и мир, предизвикување на општа опасност и други кривично-правни дејствија. На овој начин од страна на партиските послушници на Оливер Спасовски е сторено кривично дело несовесно вршење на служба. Должност и задача на министерот и неговите соработници е да ја заштитат безбедноста на учесниците на протестот, а тие очигледно тоа не го направиле загрозувајќи го нивниот живот, порача Чулев. 

 

 Според него, за време на вчерашниот инцидент на локацијата на која се случи инцидент и каде е неопходно дури и висинско обезбедување, видливи биле само тројца позорникари.

-Ова значи дека целосно е потфрлено во физичкото обезбедување со непредвидување на доволен број на полициски сили и соодветни материјално-технички средства. Дополнително, од професионално неразбирливи причини, мистериозно затаило и оперативното обезбедување, во насока на благовремено информирање за групирање на лица со намера за попречување на протестот и загрозување на јавниот ред и мир и односно загрозување на безбедноста односно животот на протестантите, обвини Чулев без да спомене ништо за наводниот обид за убиство на лидерот на ВМРО-ДПМНЕ Христијан Мицкоски на протестот – на кој во тој момент не ни присуствувал, а се докажа дека лицето со пиштол е од структурите на нивниот коалиционен партнер Алијансата за Албанците.

Со овие обвинувања целта по се изгледа е да се покрие смешната вонредна прес конференција на Мицкоски доцна навече и предоцна, бидејќи идентитетот на пиштолџијата веќе беше објавен и тој беше приведен.