Муцунски на средба со Баро во Париз

Министерот за надворешни работи и надворешна трговија, Тимчо Муцунски кој денеска претстојува во работна посета на Париз, преку социјалните мрежи сподели дека денешниот ден го започнал со одлична средба со неговиот домаќин, министерот за Европа и надворешни работи на Франција, Жан-Ноел Баро.

За време на средбата, како што вели, двајцата заеднички изразиле задоволство од развојот на билатералните односи и разговарале за понатамошна цврста и продлабочена соработка меѓу двете земји – како на политичко, така и на економско ниво, преку зајакнување на соработката помеѓу компаниите и владите.

„Упатив искрена благодарност за поддршката од Франција по трагедијата во Кочани.Франција е наш искрен пријател и поддржувач. Се заблагодарив и за француската поддршка за исполнување на нашата стратешка цел – членството во Европската Унија. Министерот Баро ја реафирмираше цврстата поддршка на Франција за нашиот пристапен процес, истакнувајќи дека неговата земја ќе продолжи да се залага за проширување на Унијата и активно да придонесува кон остварување на оваа наша цел“, истакна во својата објава министерот Муцунски.