Москва тврди дека Бахмут „паднал“, Зеленски – дека градот не постои

„Мислам дека не“, рече Зеленски, зборувајќи на англиски. „Но, треба да разберете дека таму нема ништо. Тие уништија сè“, рече тој, мислејќи на руските сили. „Нема згради. Штета. Тоа е трагедија. Денес Бахмут е само во нашите срца. Нема ништо на ова место“, рече Зеленски.

Од Кабинетот на Зеленски подоцна појаснија дека тој не рекол дека градот „паднал“.

Русија уште од вчера тврди дека има победа во Бахмут, иако укрианските власти соопштија дека битките за разурнатиот источен град продолжуваат. Тврдењето од 20 мај на руското Министерство за одбрана, како и на шефот на платеничката група Вагнер, беше проследено со честитка од рускиот претседател Владимир Путин. Тој им честиташе на војниците „за заземањето на градот“, со порака дека најзаслужните ќе бидат наградени, пренесоа руските агенции.

Руската приватна армија Вагнер на 20 мај соопшти дека конечно го освоила источниот украински град Бахмут по најдолгата и најкрвавата битка во војната. Руските трупи се приближија до Бахмут во летото 2022 година, откако ги завршија офанзивните операции во Северодонецк, Лисичанск, Рубижни и Попаснаја. Активните борби во Бахмут започнаа есента минатата година.

Пригожин, кој постојано ја осудува руската редовна војска за напуштање на теренот заземен претходно од неговите луѓе, рече дека неговите сили за пет дена ќе се повлечат од Бахмут за да се одморат, предавајќи ги урнатините на градот на редовната војска.

Москва долго време тврди дека заземањето на Бахмут ќе биде отскочна даска кон напредување подлабоко во регионот Донбас, за кој тврди дека го анектираше од Украина.

Тешката битка достигнува кулминација токму во моментот кога Киев ја подготвува својата контраофанзива.